Një postim në mediat sociale që pretendonte se një aktore indiane kishte vdekur për shkak të kancerit të qafës së mitrës dhe një video pasuese që njoftonte se ajo ishte gjallë, ka ndezur një debat mbi enigmat etike që rrethojnë fushatat e publicitetit në internet.
Të premten, llogaria zyrtare e Poonam Pandey në Instagram doli me një deklaratë duke thënë se aktorja 32-vjeçare humbi betejën me sëmundjen e rëndë.
Shumë i besuan postimit, mediat raportuan lajmin për vdekjen e saj brenda pak minutash dhe rrjetet sociale ishin plot homazhe për aktoren.
Pandey ka luajtur në disa filma, por ajo u bë një sensacion në internet për shkak të postimeve të saj të diskutueshme dhe fushatave publicitare. Në vitin 2011, aktorja premtoi se do të shfaqej nudo nëse skuadra indiane e kriketit fitonte Kupën e Botës, megjithëse ajo nuk e mbajti premtimin.
Vetëm një ditë pas “vdekjes” së saj, Pandey postoi një video duke thënë se ajo e kishte sajuar lajmin për vdekjen e saj dhe se postimi në Instagram për 1.3 milionë ndjekësit e saj ishte pjesë e një fushate në rrjetet sociale për të ndërgjegjësuar rreth kancerit të qafës së mitrës.
Të enjten, një ditë përpara se Pandey të publikonte njoftimin për vdekjen e saj, Ministrja e Financave e Indisë, Nirmala Sitharaman njoftoi se qeveria po merrte hapa për të vaksinuar vajzat nga 9 deri në 14 vjeç, megjithëse ajo nuk përmendi detaje specifike rreth fushatës.
Koha e postimit të Pandey bëri që shumë përdorues të mediave sociale të spekulonin se ishte pjesë e strategjisë së qeverisë për të publikuar vaksinën HPV, por as qeveria dhe as Pandey nuk kishin bërë një marrëveshje të tillë.
Gjatë fundjavës, postimi dhe video e saj gjeneruan një debat rreth metodës së përdorur për të tërhequr vëmendjen ndaj një çështjeje serioze si kanceri i qafës së mitrës.
Disa kritikuan gjithashtu mediat për raportimin për vdekjen e Pandey pa verifikuar lajmin. Të shtunën, Schbang – agjencia e mediave sociale përgjegjëse për krijimin e fushatës – u kërkoi falje atyre që u prekën nga fushata.
