Ministri i Turizmit, Blendi Klosi, është shprehur optimist për një ndër sektorët më të goditur në Shqipëri, pas krizës ekonomike nga pandemia, atë të turizmit.
Në një kohë që ky sektor ndodhet në kushtet e mbijetesës, edhe pas hapjes së kufijve, në një intervistë për emisionin “5 pyetjet nga Babaramo”, në Report tv, Klosi la të kuptohej se turizmi në Shqipëri do të rikuperohet shumë shpejt.
Ministri madje foli edhe për prenotimet që nuk janë anuluar dhe hotelet plot gjatë fundjavës në bregdet, sikur situata të ishte vërtet kaq rozë.
Në datën 12 qershor do të nisin charterat e parë nga Bjellorusia dhe nga Ukraina, ndërsa sa u përket prenotimeve Klosi u shpreh se asgjë nuk është anuluar nga frika e pandemisë, por vetëm janë shtyrë ose janë pending!
Në fakt, të vetmet rezervime që nuk janë anuluar janë ato që janë bërë me parapagim. Në një prononcim për “iconstyle.al”, kryetari i Sektorit të Hotelerisë, Zak Topuzi u shpreh se ministri e ka fjalën për ato kontrata të turistëve që vijnë me charter, që kanë bërë paradhënie dhe normalisht janë në pritje. Por këta turistë përbëjnë vetëm 5 për qind të të gjithë turizmit, dhe nuk luajnë ndonjë rol domethënës në ngritjen e turizmit në përgjithësi:
“Ato hoteleri që janë prenotuar me chartera janë 5 për qind e turizmit në Shqipëri, pra një bllok hotelesh në Golem dhe pak të tjerë, por nuk përbejnë këta të gjithë bazën e turizmit. Si zgjidhje është që, ai ka paguar paradhënie, e mban pending një prenotim. Por 80 për qind e turistëve vijnë me mjetet e tyre, 60 për qind janë Kosova, Italia dhe Maqedonia. Nga kontaktet që kemi me 250 hotelet që janë në linjë direkte vijon të jetë situata e njëjtë pa lëvizje të mëdha. Thjesht tentojnë njerëzit por nuk ka akoma situatë të qartë”.
Por ndërkohë që këtu u fol për atë pjesën e vogël të turistëve që kanë bërë parapagim, e vërteta është që pjesa tjetër që nuk ka bërë parapagim, përbën edhe numrin më të madh të prenotimeve të anuluara. Duke ju rikujtuar prononcimet e operatorëve turistikë në prill, duhet të theksojmë se për shkak të situatës së krijuar nga COVID-19, janë anuluar 70 për qind e prenotimeve në këtë sektor çka do të thotë se ky vit do të përballet me një tkurrje të madhe sa i takon gjenerimit të të ardhurave financiare.
“Iconstyle.al” kontaktoi edhe me hotelin “Old Town” në Dhërmi, që na konfirmoi se ka një numër shumë të lartë të anulimeve të rezervimeve.
Ministri foli gjithashtu për strukturën e hotelerive shqiptare, duke e parë nga aspekti i menaxhimit të tyre, që do ta kenë më të lehtë ta manovrojnë situatën në kohë pandemie, duke qenë më të vegjël:
“Është një strukturë në hov e sipër, ky vit do të vijojë me intensitet besoj, megjithëse jemi në kulmin e pandemisë, kudo në botë në Greqi, Turqi, Kroaci, hotelet nuk hapen sepse janë struktura të mëdha dhe biznese të konsoliduara”.
Por duke pasur parasysh rregullat e distancimit social, apo mosfunksionim në kapacitet të plotë të një bari apo restoranti për të mos patur mbipopullim, kjo duket se nuk është shumë në favor të bizneseve në vendin tonë.
Hotelet në bregdetin e Durrësit kanë të gjithë nga një sipërfaqe maksimale 2 mijë ose 3 mijë metër katror, në krahasim me një hotel në Turqi që mund të jetë 100 mijë metra katrorë dhe nuk ka vështirësi të madhe edhe nëse përdor 70 për qind të kapacitetit të tij.
Pra, situata duket haptazi më problematike për këtë sektor nga sa e paraqet Klosi.
Për më tepër, Topuzi tha për “iconstyle.al” se përpos pjesës së kufijve që nuk ka një datë fikse në mbarë botën, nuk ka filluar as funskionimi i linjës së trageteve dhe sado të kemi dëshirë të jemi optimistë, prap, edhe ky muaj do të ikë kështu, pothuajse bosh.
/Iconstyle.al
