Kryetari i AKR-së ka reaguar për herë të parë për lajmet që po qarkullojnë në rrjet se mes tij dhe Naim Murselit, ish-këshilltarit që vrau bashkëshorten e tij, ka një lidhje sekrete nga e cila dyshohet se mund të ketë ndodhur ngjarja e rëndë. Në një postim në rrjete sociale, Pacolli i ka cilësuar deklaratat e analistëve si sjellje skizofrenie që po përdorin tragjedinë për klikime dhe për t’i prishur reputacionin.
Nga distanca shoh disa insinuata të individëve me sjellje skizofrenike që përdorin tragjedi si kjo e Liridonës për të tërhequr vëmendjen e publikut dhe për të pervetësuar ndonjë pëlqim (like) në platformat mediatike. Është e rëndësishme të ekspozohen dhe të kundërshtohen deklaratat e paqëndrueshme, pa fakte dhe të pasakta të disa “debatuesve” apo “analistëve” që njollosin imazhin dhe reputacionin e të tjerëve. Kjo do të ndihmojë në ngritjen e nivelit të bisedës dhe transparencës së informacionit për publikun dhe seriozitetin e vetë medias. Për ta sqaruar publikun, jam duke ndjekur një rrugë të gjatë dhe të planifikuar 6 muaj më parë, e cila më ka penguar të marr pjesë në varrim (për çka janë kujdesur vëllezërit, familja dhe bashkëpunëtorët e mi).
