Përmbytjet e fundit në Shqipëri kanë shkaktuar viktimën e parë në Durrës. Një 54-vjeçar, Astrit Hysenaj, u gjet pa shenja jete në zonën e Plepave, pasi dyshohet se u mor nga rrjedha e ujit gjatë përmbytjeve masive të së martës. Hysenaj ishte shpallur i zhdukur një ditë më parë nga kushëriri i tij dhe punonte pranë ndërmarrjes komunale në plazh, duke u dyshuar se humbi jetën në krye të detyrës.
Trupi i tij u gjet pas kërkimeve nga Policia dhe polumbarët e RENEA-s, ndërsa grupi hetimor po punon për të sqaruar rrethanat nën drejtimin e Prokurorisë.
Për shkak të rrezikut të lartë nga përmbytjet, autoritetet civile kanë urdhëruar evakuimin e menjëhershëm të banorëve në disa zona. Në Durrës, evakuimi përfshin Bashkinë Durrës dhe njësitë administrative Sukth dhe Katund i Ri, ndërsa në Fier është shpallur evakuimi i Njësisë Administrative Ferras. Procesi i evakuimit po kryhet në koordinim me Agjencinë Kombëtare të Mbrojtjes Civile, Prefekturat, strukturat e emergjencave dhe Forcat e Armatosura.
Prioritet u jepet fëmijëve, të moshuarve, personave me aftësi të kufizuara dhe familjeve në zona të izoluara. Transporti dhe strehimi i të evakuuarve do të sigurohen nga autoritetet lokale, shërbimet e emergjencës dhe Forcat e Armatosura. Banorët do të marrin asistencë për ushqim, veshmbathje dhe kujdes shëndetësor, ndërsa autoritetet bëjnë thirrje për të ndjekur udhëzimet dhe të raportojnë çdo situatë emergjente.
Sipas Ministrisë së Mbrojtjes situata më problematike paraqitet në qarqet Shkodër, Lezhë, Durrës, Fier, Berat dhe Gjirokastër, ndërsa në qarqe të tjera situata është nën monitorim ose pa rrezik.
Në këtë situatë, qëndrimi i qytetarëve i sigurt dhe bashkëpunimi me autoritetet është thelbësor për parandalimin e rreziqeve dhe për të minimizuar pasojat nga përmbytjet.
