Një ditë pas reshjeve të dendura të shiut që përmbytën Durrësin dhe paralizuan jetën në qytet dhe zonat përreth, situata në disa lagje vijon të mbetet alarmante. Më problematike paraqitet gjendja në zonën e ish-Kënetës dhe në Durrësin e Ri, ku uji ende nuk është tërhequr nga rrugët dytësore dhe banesat e dhjetëra familjeve.
Banorët raportojnë se shtëpitë e tyre vazhdojnë të jenë të rrethuara nga uji, duke e bërë të pamundur rikthimin në normalitet. Një prej familjeve më të prekura është ajo e Sosolëve, banesa e së cilës edhe mëngjesin e sotëm rezulton e përmbytur. Uji ka shkaktuar dëme të konsiderueshme në orenditë shtëpiake, pajisjet elektroshtëpiake dhe sendet bazë të jetesës. Familjarët shprehen të shqetësuar, pasi përveç humbjeve materiale, po përballen edhe me mungesë ndihme dhe asistence nga institucionet përkatëse, duke u ndjerë të izoluar dhe të braktisur.
E njëjta situatë paraqitet edhe në disa zona të tjera periferike, përfshirë Spitallën dhe Nishtullën, ku prania e ujit përbën rrezik serioz për shëndetin e banorëve, veçanërisht për fëmijët dhe të moshuarit, për shkak të ndotjes dhe kushteve të vështira higjieno-sanitare.
Ndërkohë, në pjesën qendrore të Durrësit situata është përmirësuar ndjeshëm. Uji është tërhequr nga rrugët kryesore dhe nga aksi kombëtar Durrës–Tiranë, duke mundësuar rikthimin e qarkullimit normal të automjeteve. Megjithatë, banorët e zonave të përmbytura kërkojnë ndërhyrje të menjëhershme dhe mbështetje konkrete për të përballuar pasojat e situatës së rëndë.
