Protestat e dhunshme që kanë përfshirë vendin tonë këto kohë, kanë dhënë dhe efektet e para.
Turistët e huaj, veçanërisht ata nga vendet nordike kanë anuluar fluturimet drejt Shqipërisë.
“Situata është dramatike”, pohon për ‘Monitor’, Rrahman Kasa, kryetar i Unionit Turstik Shqiptar dhe drejtor menaxhues tek ‘Happy Tours Albania’, që bashkëpunon me agjenci të shumta si ato të vendeve nordike, polake, çeke etj.
“Partnerët tanë janë shumë të shqetësuar nga anulimet që po bëjnë klientët e tyre”, pohon ai.
Ndonëse nuk mund të thotë ende numra, Kasa shton se agjencitë partnere kanë marrë shumë kërkesa për anulimin e rezervimeve.
Si rrjedhojë e pasigurisë që ndjejnë të huajt, ka pasur anulime grupesh që kishin rezervuar për të vizituar vendin tonë si dhe anulime konferencash dhe trajnimesh.
Vitet e fundit Shqipëria pa një rritje të ndjeshme të interesit të turistëve të huaj, me një numër rekord prej 5.93 milionë të huajsh.
Kjo shifër përkthehet në rritje prej rreth 16% në raport me vitin e mëparshëm dhe le të shpresojmë që të mos ulet këtë vit.
/Monitor
