Ngjarje si kjo e fundit, ku nxënësi goditi me karrige mësuesen e matematikës pas një debati ku iu përmendën eshtrat e të atit, ishte një shkundje për realitetin shqiptar.
Çdo ditë e më shumë, nxënësit po humbasin besimin tek figura e mësuesit që dashur padashur, po korruptohet siç po ndodh rëndom në çdo profesion.
Në redaksinë e “Iconstyle” mbërritën akuza të shumta për mësues/pedagogë të shitur në çdo cep të Shqipërisë, që japin notën në këmbim të parave apo dhuratave.
Mirëpo, problemi ka rrënjë më të thella! Ky problem nis tek mungesa e kushteve të punës dhe pagat e ulëta nga qeveria, që çojnë në korrupsionin që çuditërisht s’e dënon askush!
Një ambient i tillë pune detyron mësuesit të heqin dorë nga profesioni apo edhe thjesht ta bëjnë punën e tyre “shkel e shko”.
Statistikat e fundit kanë treguar se numri i nxënësve dhe studentëve të regjistruar në shkolla është ulur ndjeshëm, ndërsa një pjesë e godinave është mbyllur.
Ankesat e të rinjve për mungesën e kushteve në shkolla apo konvikte, shkojnë në vesh të shurdhër. Një pjesë e godinave të konvikteve kanë mbetur në proces rikonstruksioni, megjithëse duhet të kishin përfunduar që në 2019-2021.
Këto godina nuk kanë kapacitetet e mjaftueshme për studentët, në shkolla mungojnë hapësira ndërvepruese, biblioteka apo mensa shtetërore.
Nxënës të lodhur nga mësues dhe mësues të lodhur nga nxënës, por të dyja palët të lodhura mirë e mirë nga një qeveri neglizhente dhe e korruptuar po vetë gjithashtu!
