Sirianët që i shpëtojnë luftës janë të shpërndarë anë e mbanë botës. Një pjesë e tyre kalojnë nëpër Shqipëri dhe si destinacion kanë vendet e BE-së. Mirëpo, ka edhe nga ata sirianë që kanë kërkuar azil politik në vendin tonë ssi dhe janë strehuar nëpër kampe, e të tjerë kanë ngecur këtu pas mbylljes së kufijve për shkak të situatës Covid-19 në mbarë botën.
Jo vetëm Shqipëria, por edhe Greqia, Maqedonia, Kosova dhe Mali i Zi i kanë mbyllur kufijtë e tyre si masë parandaluese për përhapjen e Covid-19.
Qindra sirianë kanë shfrytëzuar në fillim të pandemisë kufirin e gjelbër për të ardhur në territorin tonë. Pika me fluksin më të lartë të hyrjes së tyre ka qenë fshati Sinicë në Devoll, ku sirianët pa asnjë kontroll kanë zbarkuar në territorin shqiptar në pamundësi për të udhëtuar me automjete. Por ata gjithashtu kanë qenë të pakontrolluar, pasi kanë qëndruar për ditë të tëra në vende të tjera me shifra të larta të të prekurve me Covid-19.
Nga ana tjetër, mungojnë edhe kapacitetet për t’i futur sirianët në karantinë apo të detyrohen të vetëkarantinohen. Shqipëria nuk mund të ketë kapacitete për të përballuar qindra sirianët që vijnë në territorin tonë, ndërkohë që dyshimet se mund të jenë prekur me Covid-19 janë të mëdha.
Pa asnjë mëdyshje mund të thuhet se sirianët janë një rrezik më shumë për Shqipërinë, ndërkohë që shifrat e Covid-19 kanë qenë më të lartat këto muaj dhe vala e tretë e virusit që po kalon vendi ynë është më e nxehta.
