Mes lotësh e dhimbje sot Arbenita Bunjaku, vajza e Afrim Bunjakut oficerit të lartë që ra heroikisht në Veri të Kosovës, i ka dhënë lamtumirën e fundit babait të saj, me një dedikim prekës. Në mbledhjen përkujtimore, Arbenita e përlotur teksa e quan ‘Hero’ babain e saj, u shpreh se gjithë Kosova do ta kujtojë me dhimbje dhe me mall, po aq sa ajo. Në fund të fjalës së saj ajo i dha edhe një premtim babit të ndjerë.
“Heroi im, babai im. Sa vështirë e kam të shkruaj për ty babai im. Para kohe, unë mbeta jetim, kurrë se kam besuar. Ikja jote babi, na la një plagë të madhe në zemrat tona. Babi nuk e di si do t’jetoj unë pa ty. Si të jetoj unë pa heroin tim?Hyra brenda në shtëpi dhe ty nuk të pashë. Është shumë e rëndë për mua. Vendin tënd në shtëpi nuk e zëvendëson askush. Të gjitha na i mësove, por si të jetojmë pa ty, asnjëherë. Babi, ti ishe një njeri i dashur për familjen, shoqërinë ashtu edhe për punën. E flijove jetën për liri, për këtë vend që ne dhe Kosova të jemi të gjithë krenarë me ty, me heroizmin tënd, mundin dhe punën që e kë bërë për këtë vend. Të premtoj babi që do të jem gjithë krenar me ty dhe do të ndjekim gjithmonë rrugën tënde. Me mall dhe dhimbje do të përkujtojmë gjithmonë heroi im, babai im”, u shpreh ajo mes lotësh!
View this post on Instagram
Afrim Bunjaku mbeti i vrarë ditën e djeshme në Leposaviç në veri të Kosovës, nga një sulm me armë e municione nga autorë të cilët dyshohet se janë serbë, por nuk ka ende një konfirmin zyrtar. Persona të armatosur bllokuan rrugën me kamionë dhe më pas qëlluan me breshëri arme drejt Policisë së Kosovës. Ngjarja tronditëse u shënua në orët e para të mëngjesit, ndërsa ka patur reagime të shumta nga zyrtarë të lartë të vendit dhe ndërkombëtarë.
