Fëmijët janë më të prekurit nga situata e Koronavirusit që na ka izoluar në shtëpitë tona!
T’ju thuash atyre se nuk duhet të dalin jashtë të luajnë, tani që edhe shkollat dhe kopshet janë mbyllur duket si një mision i pamundur.
Ndaj ne kemi sjellë sot disa këshilla për prindërit në vështirësi, që nuk dinë sesi t’ua bëjnë më pak të frikshëm përhapjen e virusit që na rrezikon të gjithëve.
Olta Marku, psikologe këshillimi, ka renditur disa këshilla bazë që duhet t’i kenë parasysh të gjithë prindërit kur ju shpjegojnë fëmijëve të tyre se çfarë është COVID-19.
Shkrimi i plotë:
Bota po përballet me pandeminë Covid 19. Ne si të rritur arrijmë ta perceptojmë dhe studiojmë situatën që po kalon vendi. Ne jemi të ndërgjegjshëm për rregullat që duhet të zbatojmë dhe për pasojat që sjell ky virus. Fëmijët janë ata që nuk e perceptojnë dhe kuptojnë këtë situatë, por ato arrijnë të shohin mërzitjen dhe frikën e prindërve.
Çdo prind këto ditë është përballur me pyetje nga më të ndryshmet nga të vegjëlit e tyre si psh: Përse ne po qendrojmë në shtëpi? Pse nuk shkojme në kopësht/shkollë? Pse nuk dalim të luajme me shokët në park? Pse ju nuk shkoni në punë? Çfarë është Koronavirusi që jep televizori?
Këshilla e parë që duhet të vihet në zbatim është që duhet të shmangni televizionet që japin këto informacione në prani të fëmijeve. Fëmijet në televizor duhet të shohin filma vizatimorë dhe programe për moshën e tyre. Fëmijët bëjnë pyetje dhe pyetjet e tyre nuk duhet të injorohen pasi është shumë e rëndësishme që ata të marrin përgjigje.
Fëmijët janë ata të cilët nuk duhet të ndjejne ankth apo frikë. Duhet t’i mbajmë sa më larg frikës së kësaj situate. Perjetimet emocionale të tyre janë më të rëndësishmet. Mos shfaqni panik, ankth, frikë e tension në prani të tyre. Jini të buzëqeshur dhe shijojeni periudhën që po kaloni me ta duke ju treguar dashurinë dhe kujdesin ndaj tyre. Shpjegoje situatën në të cilën ndodhemi duke ju pergjigjur pyetjeve të tyre në mënyrat më të ndryshme që ata të arrijnë të kuptojnë aq sa duhet për moshën e tyre.
Nëpërmjet lojrave dhe vizatimeve është një mënyrë e mirë pasi fëmija dhe zbavitet dhe merr përgjigjet e pyetjeve që bën. Mund t’u jepet përgjigje pyetjeve të tyre kureshtare dhe nëpërmjet krijimit të një historie si psh: “Një mikrob i vogël u krijua në një vend të botës. Ky mikrob u rrit dhe u bë i madh. Ai mori dhe emrin Koronavirus siç ti e ke dëgjuar. Ky mikrob është i padukshëm. Ne nuk e shohim atë. Por ai është një mikrob shumë i keq që do që të luftojë me njerezit. Ai ka filluar të udhetojë në të gjithë botën me makinën e tij të padukshme.
Tek njerëzit që nuk mbajnë pastër rrobat, nuk lajnë duart, pështyjnë në rrugë, ky virus hyn në trupin e tyre dhe i sëmur ata. Prandaj ne rrimë në shtëpi, nuk ikim në shkollë sepse ne nuk e dimë nëse shokët tanë i kanë mbajtur rregullat e pastërtisë. Nëse ato nuk i mbajnë rregullat e pastërtisë, marrin mikrobin dhe ne duke ndenjur me ta mund ta marrim gjithashtu. Ne kemi mësuar se gjithmonë duhet të kujdesemi për veten, duhet të veshim rroba të pastra, duhet të lajmë duart sa herë që prekim diçka, duhet të lajmë dhëmbeët, kur teshtijmë apo kollitemi duhet të përdorim shami letre dhe ta hedhim më pas atë. Mikrobi shkon tek njerëzit që nuk mbajnë pastër veten dhe ambjentin, prandaj të gjithë sëbashku duhet të ndjekim rregullat e pastërtisë që virusi të zhduket përgjithmonë.
Ne do rrimë në shtëpi do mbajmë pastër veten dhe mikrobi kur të shohë se ne jemi të pastër, do ikë për të mos u kthyer më. Ne do kënaqemi në shtëpi sëbashku dhe kur të ikë mikrobi, do kthehemi në shkollë dhe do dalim të luajmë në park.”
Shpjegojuani situatën me fjalet më të thjeshta.
Bëjeni të ndjeje emocione pozitive dhe të kalojnë bukur, ngrohtë dhe me zbavitje periudhën e qendrimit në shtëpi. Angazhojini ata me vizatime, lexim, shkrim dhe zbavitini ata me lojra të ndryshme. Kthejeni shtëpine tuaj në një park lojrash ku ai të mos e ndjejë mungesën e lojrave jashtë shtëpisë. Behu shok me të dhe luaj me të që ai mos ta ndjeje mungesen e miqve. Organizo një orar kinemaje ku ai të shohë filma vizatimorë, shpjegoji shumë shpesh rregullat e pastërtisë dhe edukoje që t’i zbatojë ato.
Duke ruajtur qetësinë dhe mos përhapjen e panikut do jemi më optimistë për kalimin e kësaj situate.
