Futbollisti Redi Jupi dhe Vivian Jupi, lidhën kurorë 10 vite më parë në një dasmë madhështore dhe sot janë të bekuar me tre fëmijë. Por si lindi historia e tyre e dashurisë?
“Edhe pse jemi të dy profileve të ndryshme, pasi unë jam ekonomiste ne u takuam bashkë gjatë pushimeve në Dhërmi. Aty jemi njohur, kemi shkëmbyer numrat e telefonit dhe shkëndijat e para me njëri-tjetrin. Pastaj rrodhën vetë gjërat. Unë nuk e kisha njohur Redin më parë sepse s’kisha njohuri nga futbolli pasi jetoja në Francë. E kam parë për herë të parë 6 muaj përpara se të ndodhnin gjërat. Ma prezantuan shoqet e mia, sepse Redi në atë kohë ishte me popullaritet të madh femëror në Shqipëri”, tha Vivian.
Ndërkohë ish-futbollisti Redi Jupi e cilësoi takimin, si një ditë të bekuar.
“Në fakt ka qenë shumë interesante sepse ishte hera ime e parë që bëja pushime në Gusht. Kur mbaron kampionati ne kemi 1 ose 2 javë pushim dhe përgatitemi për kupat e Europës. Hera e parë që bëra pushim gjeta bashkëshorten. Ishin pushime të bekuara. Ishte një periudhë shumë e mirë sepse unë po shkëputesha nga sporti dhe kisha atë hezitimin se çfarë do të bëja. Isha në një moment meditimi të thellë dhe kjo më ndihmoi të bëj zgjedhjen e duhur. Mua në fillim më pëlqeu shumë thjeshtësia e Vivit dhe fakti që nuk më njihte fare për profesionin që kisha”, tha Jupi.
