Përplasja e grupeve muzikore Babastars dhe OTR në Prishtinë, që përfundoi me plagosjen e Noizy-t dhe reperit Varrosi, është sqaruar mbrëmë nga dy reperat Skivi dhe Cozman.
Në një lidhje të drejtpërdrejtë me emisionin Top Show, Skivi mbështeti versionin që grupi i tij ishte provokuar për këtë sherr nga çunat e OTR dhe se dhuna dhe provokimet nuk janë kurrsesi, modeli që Babastars ndjekin.
“Ne nuk e nisem sherrin, e nisen ata. Unë kisha një takim pune në “Swiss Diamond”. Isha i shoqëruar atë ditë dhe ora ishte rreth 17:00 pasdite. Para se të hyja, aty kishte një grup njerëzish. Unë vazhdova punën time dhe fillova të ecja. Ata filluan të shanin në mënyrat më të këqija. Ata u bënë agresive me fjalë në prezencën e femrës. Sapo u ula nuk porosita as të haja. Thirra menaxherin e hotelit”, tha Skivi, i cili pranoi që ishte me politikanin Behgjet Pacollin.
Mbërritja e Cozman, sipas tij, nuk ishte aspak për t’u grindur sepse përballë një grupi aq të madh, Cozman nuk mund të vinte i shoqëruar me vetëm një person, për të bërë sherr. Ai, sipas Skivit, ishte duke xhiruar klipin që do e nxjerrë së shpejti. Cozman tha që ai reagoi pasi grupi e rrethoi dhe i goditi pasqyrën e makinës.
Skivi tha që kushdo që njeh atë, familjen e tij e di që ata nuk kanë mbështetur kurrë dhunën. Në 15 vite, tha ai, ne kemi treguar që nuk jemi për provokime dhe mbi të gjitha kemi përgjegjësi para fansave për t’iu treguar që nuk kemi model dhunën dhe armët.
