Ashtu si të gjitha çiftet, edhe celebrities zgjodhën ditën e Shën Valentinit për të uruar njeriun e tyre të zemrës. Veç dedikimeve në ditën e të dashuruarve nuk munguan as dhuratat. Lulet dhe çokollatat ishin ndër surprizat më të preferuarat, sikur simbolizojnë dashurinë dhe ëmbëlsinë e lidhjes së çifteve. Nga artistët te politikanët, urimet publike ishin të pranishme nga të gjithë ditën e djeshme.
Ish-kryeministri Sali Berisha, ndonëse është i martuar prej shumë vitesh, nuk e la pas dore festën e të dashuruarve. Duke publikuar një fotografi ku shihet bashkë me të shoqen Liri Berisha, ai shkruan: “Urimet më të përzemërta për Shën Valentinin, ditën e forcës magjike të përjetshme të njeriut!”.
Edhe djali i tij, Shkëlzen Berisha, i cili tashmë e ka bërë publike lidhjen me Armina Mevlanin prej pak kohësh, e uroi këtë të fundit. Përmes një postimi në rrjetet sociale Shkëlzeni shkroi përkrah fotos me të dashurën e tij: “Gjëja më e mrekullueshme që më ka ndodhur!”.
Armina shpërndau të njëjtën foto në të cilën ajo i ka hedhur krahun dhe duken të dy të buzëqeshur, duke shkruar edhe ajo një dedikim për të: “Dhurata më e bukur që mund të na japë Zoti është Dashuria! Pa dashuri çdo gjë do të ishte bardh’ e zi. Jam me fat që e kam, dhe ju uroj të gjithëve të bekoheni prej dashurisë në çdo ditë të jetës suaj!”. Ndërsa kanë planifikuar një darkë intime së bashku, Armina ka ndarë në “Snapchat” disa momente nga zgjimi i 14 shkurtit. Ndërsa Shkëlzeni përpiqej të bënte gati paketimin e dhuratave që ajo t’i gjente sapo të zgjohej, Armina ishte fshehur dhe dëgjonte. “Findus nuk po e lë të ma paketojë dhuratën!”, ka shkruar ajo për macen e tyre që ngacmonte Shkëlzenin teksa përgatiste surprizën.
Ndërkohë që disa çifte ky Shën Valentin i gjeti më i plotësuar, me një familje më të madhe. Rudina Magjistarin mori një buqetë me trëndafila të kuq nga partneri i saj, Xhavit Bajrami. Një fotografi të luleve ajo e ka postuar në “Instagram”, ku bashkëngjitur shkruan: “Trëndafila, faleminderit dielli im, dashuria e jetës sime. Dita e Shën Valentinit, të dua”. Rudina dhe Xhaviti janë të lidhur prej disa vitesh, ndërsa janë bërë prindër të një vajze.
E njëjta gjë ndodhi edhe me çiftin Alban Skënderaj dhe Miriam Canin, të cilët u bënë prindër më 28 nëntor të vitit të kaluar me vazjën e parë, Ameli. “Unë dhe ti, erdhëm nga ëndrrat në jetë, duke mposhtur stuhitë dhe rrufetë, dhe mbollëm një rreze diku, të shkëlqejë sot një diell i vërtetë”, i shkruan Albani Miriamit. Ky dedikim për Shën Valentin, është shkëputur nga vargjet e këngës më të re të Alban Skënderajt, “Unë dhe ti”. Videoja e këngës u shfaq për herë të parë në ditën e të dashuruarve. Mes çiftesh të dashuruarish, shfaqen në videoklip edhe Albani dhe me Miriami, e cila mban në krahë Amelin. Kjo këngë e ka rikthyer këngëtarin pas një mungese të gjatë.
Ndërsa Sara Hoxha tashmë është mësuar duke i shprehur publikisht ndjenjat për të fejuarin e saj, Ledion Liço. “Ti i dhe kuptim jetës sime, ti e ktheve dhimbjen në forcë!”, shprehet Sara për Ledionin.
