Pjesëmarrja e tij si kryetar jurie në “Dancing With Stars” e ka vendosur Kledi Kadiun në qendër të vëmendjes së publikut shqiptar.
Balerini i njohur këtë mëngjes ka qenë i ftuar në “Wake Up” ku ka zbuluar shumë detaje nga eksperienca e tij në show-n e kërcimit deri më tani.
Përpos anëtarëve të jurisë, Kledi ka komentuar edhe konkurentët pjesëmarrës, për të cilët u shpreh se e kanë marrë seriozisht garën.
“Konkurrentët e kanë marrë më seriozisht seç duhet. Është mirë të impenjohesh, por jo të bësh luftë se nuk do bëhën balerinë profesionistë. Kanë disiplinë pune, bëjnë garë me njëri-tjetrin. Ka nga ata që janë të lindur për këtë zanat, pastaj ka nga ata që nuk janë shumë të prirur dhe nuk kanë shumë rezultat. Por po më ndryshon mendimi nga nata në natë. Disa konkurrentë më kanë dhënë përshtypjen se do rriten nga nata në natë, por pastaj kam ndërruar mendim. Siç ka qenë dhe e kundërta. Të gjithë kanë bërë një progres, sepse sa më shumë prova që bëjnë, e kanë thyer atë ndjenjën e ankthin dhe ngurtësimit. Unë shikoj anën teknike, posturën, qëndrimin, elegancën. Sepse hapat pak a shumë ato do jenë. Hapat edhe mund të gabohen, por është energjia ajo që nuk gabon.”
Si një profesionist i vërtetë, Kadiu jep mendimin e tij në lidhje me performancat e konkurrentëve. Mirëpo siç dihet në këtë spektakël, përpos personazheve publik të cilët nuk janë të fushës, “garojnë” edhe balerinë profesionistë.
I pyetur nëse ka pasur ndonjë nga balerinët profesionistë që është mërzitur nga vlerësimi, Kledi Kadiu u shpreh: “Ndoshta Jurgeni. E përsëris edhe njëherë se si e shoh unë diçka, e sheh dikush tjetër ndryshe. Është çështje shijesh.”
