Sot në emisionin “Shqipëria Live” ishte si temë diskutimi : “Të njoh nga zëri.”
Gerta Herta, e cila ka qenë zëri i parë i Top Albania Radio që e hapi më 14 shkurt të vitit 1998, ishte e ftuar nëpërmjet Skype.
Sot Gerta tregoi se ka pasur njerëz që e mendonin se ishte bionde vetëm nga zëri.
“Kishte njerëz që më mendonin për bionde. Në imagjinatën e tyre më kishin menduar ndryshe dhe u dola krejt ndryshe. Zëri është dhuratë nga Zoti, por nëse nuk do të kisha bërë trajnim për zërin nuk do të isha këtu ku jam. Këtu tingëlloj ndryshe e në mikrofonin e radios më ndryshe”, tha gazetarja.
Më pas ajo tha se është më komode në radio se sa në televizion.
“Në radio është më mirë. I ngre këmbët në tavolinë, nuk më shikon njeri. Pastaj unë nuk shquhem për ndonjë imazh të kuruar në jetën time të përditshme. Është më komode në radio”, përfundoi Herta.
Radioja cilësohet nga studiuesit si një media intime. Ajo arrin të krijojë një lidhje të veçantë mes marrësit e dhënësit, duke i lënë kështu vend imagjinatës.
Mashall McLuhan, një nga studiuesit e medias dhe komunikimit ka shprehur se po të mos ishte radioja, Hitleri ‘nuk do ekzistonte’, ishte radioja dhe zëri i tij që bëri idenë e tij të pranohej gjerësisht.
