Ditën e djeshme, Kryeministri Rama, shefja e infektivit Najada Como, mjeku Pëllumb Pipero, mjeku Tritan Kalo dhe të tjerë emra të njohur morën vaksinën anti-Covid.
Pas daljes nga stadiumi Air Albania, mjekët u shprehën se ndihen mirë pavarësisht se do të ketë pasojat e saj të vogla.
Pipero u shpreh se vaksina ka vetëm pasoja afatshkurtra, të tilla si: dhimbje, skuqje, të përzin për të vjellë, etj.
Pas vaksinimit, mjeku Tritan Kalo ka dhënë një intervistë për emisionin “Open”, ku është shprehur se s’ka asnjë problem dhe ndihet shumë mirë.
“Asnjë problem, unë kam bërë vaksina të ndryshme edhe për sëmundje më të rrezikshme se COVID. Kam punuar në vende të ndryshme dhe kam bërë vaksinë edhe për Ebola-n. Në fund të vaksinimit merrnim një stik që tregonte që ishim vaksinuar. Unë e vura në ballë që të tregoja se isha vaksinuar dhe të mos kishin frikë. Teoritë konspirative nuk kanë asnjë baze reale dhe është një llojë ndalimi që duan t’i bëjnë imunizimit të popullatës. Ne që rrezikojmë jetën pranë të sëmurëve, jemi të aftë të rrezikojmë edhe jetën për të marrë vaksinën. Duhet të vazhdojmë të mos neglizhojmë masat që kemi vendosur. Vaksina është një produkt jo i dëmshëm nëse aplikohet në kushte të përshtatshme”, është shprehur Kalo.
