Më shumë se 1.500 rebelë janë arrestuar pas grushtit ushtarak të dështuar, nga i cili u vranë të paktën 90 persona dhe u plagosën më shumë se 1000 të tjerë. Presidenti turk Rexhep Tajip Erdogan u zotua se do të hakmerret për kryengritjen e përgjakshme. Erdogan bëri rikthimin e tij triumfues në Stamboll, pasi forcat e tij shtypën grushtin e shtetit të premten në mbrëmje.
Një fraksion i ushtrisë që e quan veten “Këshilli i Paqes”, u përpoq të rrëzonte qeverinë për të “mbrojtur të drejtat e njeriut” dhe për të rivendosur demokracinë nga partia AKP e Erdoganit, e cila është përballur vazhdimisht me kritika nga grupet e të drejtave të njeriut dhe aleatët perëndimorë mbi goditjet brutale ndaj protestuesve anti-qeveritarë.
Po kush është organizatori i kësaj kryengritjeje? Kjo ende nuk është e qartë, por Erdogan ka fajësuar “armikun e tij të vjetër”, Fethullah Gylen për orkestrimin e kryengritjes. Kleriku mysliman Gulen, rivali i presidentit i cili jeton në mërgim në Pensilvani, SH.B.A. si kreu i një lëvizjeje fetare, është fajësuar shpesh herë për trazirat politike në Turqi.
Pesë orët e kaosit në Turqi, filluan kur dy autobusë me ushtarë morën nën kontroll selinë e agjencisë shtetërore të lajmeve TRT. Pas lansimit të grushtit të shtetit, ushtria turke deklaroi shtetrrethim dhe u bëri thirrje qytetarëve që të qëndrojnë në shtëpitë e tyre.
Nga ana tjetër, Erdogani përmes një video-mesazhi u bëri thirrje mbështetësve të injorojnë rendin dhe të dalin në rrugë për të mbrojtur shtetin e tyre. Pas kësaj deklaratë, në vend filluan trazirat.
Kryeministri Yildirim urdhëroi forcat ushtarake besnike që të shënjestronin helikopterët, avionët dhe tanket e përdorura nga grupi i ushtarakëve pjesëmarrës në grushtin e shtetit. Një helikopter i tyre u qëllua teksa po fluturonte mbi Ankara, duke vrarë të gjithë pjesëtarët në bord.
Ndërkohë sot, të shtëna sporadike raportohen ende në disa qytete të vendit dhe ka raportime se grupe ushtarësh pjesë e grushtit të shtetit po vijojnë rezistencën. Mediat vendase thonë se ata zotërojnë ende disa tanke dhe helikopterë dhe kanë refuzuar deri më tani që t’u dorëzohen autoriteteve. Edhe shefi i Shtabit të Përgjithshëm të Ushtrisë turke, Hulusi Akar, që u raportua i marrë peng më herët nga anëtarët e grushtit të shtetit, është liruar.
*Shfleto galerinë
