Një tërmet i fuqishëm ka “shkundur” të gjitha godinat kryesore të kryeqytetit, duke sjellë panik te qytetarët mesditën e së mërkurës. Tërmeti i parë me magniturë 5.1 ballë kishte si epiqendër fshatin Hamallaj të Durrësit. Ndërkohë që sipas Institutit të Gjeoshkencave, Energjisë, Ujit dhe Mjedisit, është e pamundur të parashikojmë nëse vendi do të përfshihet nga të tjera tërmete.
“Tërmetet nuk mund të parashikohen, po duke qenë të përgatitur nga rajonizimet e kryera, mund të merren masa efektive, për të mos pasur katastrofa të dhimbshme. Profesorët me punën e tyre kanë përgatitur hartat sizmike për të shprehur rajonizimin e sizmicitetit në Shqipëri, duke evidentuar zonat më të rrezikshme për tërmete, ose për t’u treguar konstruktorëve të ndërtimit se duhen marrë masa konstruktive për t’u bërë ballë dukurive të mundshme të tërmeteve.” – shprehet në një njoftim zyrtar sizmiologu Ervin Kasaj.
Por si duhet të reagojmë gjatë tërmetit? Sipas simziologut Ervin Kasaj, duhet të fshiheni poshtë një tavoline apo objekti që nuk mund të shembet mbi ty.
“Qytetarët duhet të dinë se pas nje aktiviteti sizmik, sidomos me magnitudë mbi 4 ose më shumë në 99 përqind të rasteve, shoqërohen më pas me pasgoditje. Po marr rastin e tërmetit në Itali më 24 gusht 2016 me magnitude 6.2 te shkallës Rihter, i cili është shoqëruar pas 10 minutash me një tjetër tërmet me magnitud 4.2 të shkallës Rihter dhe pas 20 minutash me tërmet 5.2 të shkallës Rihter, ku deri më sot janë regjistruar më shumë se 1000 tërmete. Kjo do të thotë, se dhe pasgoditjet janë po aq të rrezikshme se tërmeti i parë, në të shumtat e rasteve dhe këto vijnë duke u ulur. Gjatë një tërmeti, duhet ruajtur qetësia e para, uluni menjëherë në dysheme dhe mblidhini duart dhe krahët, përpara se tërmeti t’ju rrëzojë, duke u ulur poshtë një tavoline, apo poshtë ndonjë mobiljeje që nuk mund të rrëzohet mbi ty. Kur nisin lëkundjet, gjëja më e mirë që duhet të bëni, është të mos lëvizni nga njëra dhomë në tjetrën, dilni me kujdes nga banesa pas tërmetit.” – përfundon simzologu Ervin Kasaj.
