Vendimi i Ministrisë së Arsimit për hapjen e shkollave në shtator, pas dëmtimit nga tërmeti dhe mbylljes nga pandemia e koronavirusit, ka krijuar shumë pikëpyetje në mesin e mësuesve, nxënësve dhe prindërve të cilat nuk e gjejnë përgjigjen te udhëzimi i ri!
Pak ditë më parë, Ministria e Shëndetësisë publikoi udhëzimin për zhvillimin e mësimit, i cili parashikonte rregulla mjaft të vështira për t’u realizuar në kushtet që jemi, nga distanca 1,5 m që përgjysmon numrin e nxënësve në klasë e deri te mësimi me dy turne apo detyrimi për të vendosur maskat.
Nisur nga ky udhëzim, iconstyle.al sjell disa nga problematikat më të mëdha që do të hasin nxënësit e mësuesit, që fatkeqësisht nuk zgjidhen me udhëzimin e publikuar të dielën:
17 shkolla të mbyllura nga dëmtimet e tërmetit! Ku dhe si do të bëhet mësim?
Vetëm në qarkun e Tiranës, ka 17 shkolla që janë mbyllur për shkak së do të ndërtohen të reja ose do të rikonstruktohen pas dëmtimit nga tërmeti i 26 nëntori.
Rreth 11 shkolla do të ndërtohen nga e para, ndërsa 6 të tjerat do t’i nënshtrohen rikonstruksionit. Nxënësit thuhet se do të zhvendosen në godina të tjera, të cilat priten të përcaktohen në ditët në vijim, por duke qenë se shkolla nis në pak javë, kjo situatë ka krijuar konfuzion. Në adresën e iconstyle.al kanë ardhur mjaft mesazhe për mënyrën e zhvillimit të mësimit pas mbylljes së disa shkollave nga tërmeti.
Më konkretisht ja çfarë na shkruan një vajzë e shqetësuar për vëllain e saj në klasë të 4-rt:
“Vëllai im hidhet në klasë të 4-rt këtë vit dhe kjo hapja e shkollave në kohë pandemie po na e shton më shumë merakun se si do vijojë ky vit i ri arsimor. Shkolla që vëllai im bënte mësim u prish për t’u rindërtuar nga e para si pasojë e tërmetit. Tani nxënesit e kësaj shkolle (Hillary Clinton) do ta nisin këtë vit të ri arsimor ne një shkolle tjetër e cila është gati 40 min larg nga shkolla qe ishte dhe per me tepër është ne një zone ku rruga qe te çon ne shkolle nuk ka trotuare por kur them qe nuk ka , nuk ka sikur 10 cm trotuar. Përveç kësaj shkolla është ne një vend te pabanuar qe nuk e kuptojmë qe çdo shkolla atje ku nuk është as qendër banimi. Se treti shkolla është fiks pasi kalon një kryqëzim gjë qe e bën akoma me te tmerrshëm faktin se fëmijë te klasës se 1 qe ndoshta nuk kane njeri se kush t’i shoqërojë për ne shkolle do te kalojnë kryqëzimin me automjete qe e kalojnë shpejtësinë e limituar”.
Maskat a nuk duhet të jenë falas?
Sipas Ministrisë së Shëndetësisë, nxënësit duhet të jenë të gjithë të pajisur me maska me një përdorim ose mbrojtëse të fytyrës prej tekstili (maskë) të cilat duhet të lahen në 60 gradë dhe të hekurosen, si dhe shami letre për higjienën e hundëve. Por udhëzimi i ri nuk e parashikon që maskat do të jenë falas. Disa rregulla bazë për maskat janë:
-Nxënësve të ciklit të ulët 9 vjeçar u rekomandohet të mbajnë maskë gjatë orëve të mësimit.
-Nxënësit e cikilt të ulët 9 vjeçar duhet të mbajë maskë gjatë aktiviteteve jashtë orëve të mësimit në ambjentet të shkollës.
-Nxënësit e ciklit të lartë 9 vjeçar dhe të mesëm duhet të mbajnë maskë në ambjentet e brendëshme dhe në të gjitha aktivitetet mësimore në ambjentet e shkollës.
-Mësuesit sigurohen që në klasë të gjithë të jenë të pajisur me maskë dhe t’i mbajnë rregullisht ato.
E meqenëse ministria po i dërgon fëmijët në shkollë në mes pandemie, a nuk duhet t’ua sigurojë vetë maskat fëmijëve, ashtu siç kanë bërë fqinjët, Italia dhe Greqia në prag të fillimit të vitit të ri shkollor?
Pak ditë më parë, ministri i Brendshëm grek, Takis Theodorikakos zbuloi se qeveria do të mbulojë nevojat për maska të të gjithë nxënësve dhe mësuesve përmes autoriteteve lokale, në kontekstin e masave të reja për koronavirusin dhe hapjen e shkollave. Edhe Italia siguroi 11 milionë maska falas çdo ditë për të gjitha shkollat.
Asnjë fond për buxhetin e arsimit!
Deri më tani nuk është akorduar një fond për buxhetin e arsimit, ndërkohë që shkolla nis në pak javë. Në udhëzimin e ri të publikuar nga Ministria e Shëndetësisë thuhet se personi përgjegjë si stafit të shkollës, i caktuar nga drejtori, duhet të kryej vlerësimin për çdo nxënës si më poshtë vijon:
➢Matje të temperaturës me termometër dixhital;
➢Sprucim me alkool 60% ose dezifektantë të tjerë në duar;
Gjithashtu në udhëzim shkruhet shprehimisht kështu: Sipas mundësive mund të vendosen vaska më solucion dezinfektues me bazë të klorit aktiv, për dezinfektimin e shuajve të këpucëve përpara hyrjes në ambientet e brendshme të shkollës.
A ia kemi lënë “mundësive”, në dorë sigurimin e këtyre dezinfektantëve? Pra kush do i financojë këto vaska dhe dezinfektantë?
Çfarë ndodhi me propozimin: Smartphone dhe internet falas për nxënësit në Shqipëri
Teksa Shqipëria është në një udhëkryq pas vendimit për hapjen e shkollave në kulmin e pandemisë, ish-ministri i Shëndetësisë, aktualisht deputet i PS-së në Kuvend Ilir Beqja kërkon që të hapet një debat për arsimin e dekadës së ardhshme. Ai propozoi që nxënësve t’u krijohet mundësia që t’u jepen falas tabletat apo smartphone-t si dhe interneti cilësor që në shtëpi të zhvillojnë aftësitë në shkencë e teknologji.
Ky propozim është në thelb mjaft me vlerë për nxënësit në Shqipëri, përsa kohë që nuk i shërben asnjë interesi vetjak apo përfitimit të ndonjë tenderi përmes kësaj kauze të ndjeshme.
Prej vitesh, nxënësit, mësuesit dhe prindërit në Shqipëri, janë gënjyer me pretendimet se teknologjia do të ishte pjesë e mësimdhënies duke harxhuar miliona euro për klasat inteligjente dhe një duzinë burimesh financiare për Reformën Kurrikulare. Shqiptarët janë të lodhur me premtime parazgjedhore dhe kërkojnë zgjidhje konkrete.
Në kushtet që jemi, Ministria e Arsimit nuk e ka hequr mundësinë e mësimit online, të cilin e ka në plan në rast mbyllje shkollash nga infeksionet, por nuk po bën asgjë për ta bërë funksional këtë mësim, nisur nga eksperienca zhgënjyese e karantinës. A ka një plan të qartë nëse mësimi kthehet online?
