Një tjetër konkurrent ka vendosur të lërë programin e “Për’puthen”, pas ikjes së shumëpërfolur të Fation Kuqarit. Bëhet fjalë për Arbër Arucin, i cili vendimin në fjalë e ka bërë të ditur përmes një postimi në InstaStory. Teksa argumenton se po largohet nga emisioni për shkak të disa angazhimeve personale jashtë Shqipërisë, nuk mungon edhe një fjali thumbuese e tij, lidhur me situatën kaotike të shkaktuar në emision, pas publikimit të fotografive të Teas me Beartin.
“Përshëndetje miqtë e mi, dua të bëj një njoftim për të gjithë ju që më keni ndjekur dhe mbështetur deri tani. Kam vendosur të mos jem më pjesë e emisionit për arsye personale të disa angazhimeve dhe detyrave shumë të rëndësishme, të lëna pezull jashtë Shqipërisë”, shkruan Aruci ndër të tjera.
Më tej shton:
“Shyqyr që dola single unë, më pa Zoti”.
Lidhur me trekëndëshin Beart, Tea, Andi, kujtojmë se para pak ditësh, dy të fundit njoftuan se po largoheshin nga emisioni si çift, për ta vazhduar kështu njohjen jashtë kamerave. Por publikimi i fotografive të Teas dhe Beartit ndryshoi katërcipërisht gjithçka!
Andi reagoi duke kërkuar falje publike dhe thënë se kishte mbetur pa fjalë. Ai tregoi se gjithë këto kohë ishte detyruar të heshtte dhe se ka qenë në dijeni për lidhjen e Teas me Beartin. Andi u shpreh se ka mbajtur gojën mbyllur edhe para familjes e miqve të tij, por kjo gjë nuk do të ndodhë më. Madje shtoi se kjo ka qenë arsyeja pse ka munguar shpesh në emision dhe se i është kërkuar të rikthehet e të dalë se s’bën çift me Tean.
