Aktorja e njohur, Nichelle Nichols ka ndërruar jetë në moshën 89-vjeçare. Ylli i “Star Trek” humbi jetën dhe djali i saj publikoi një postim në Facebook të dielën.
“Mbrëmë, nëna ime, Nichelle Nichols ndërroi jetë”, shkroi djali i saj, Kyle Johnson.
“Drita e saj sidoqoftë, si galaktikat e lashta që shihen tani për herë të parë, do të mbetet për ne dhe brezat e ardhshëm për ta shijuar, mësuar dhe marrë frymëzim. Ajo jetoi një jetë të mirë dhe ishte një model për të gjithë ne”- vijoi ai në njoftimin që dha.
“Unë dhe pjesa tjetër e familjes sonë, do të vlerësonim durimin tuaj ndërsa vajtojmë humbjen e saj derisa të mund të shërohemi mjaftueshëm për të folur më tej”.
Aktorja Nichols ishte kaq shumë e njohur dhe e dashur për publikun amerikan por jo vetëm.
Nichelle Nichols ishte një aktore, këngëtare dhe kërcimtare amerikane e njohur për portretizimin e saj të Nyota Uhura në Star Trek: The Original Series dhe vazhdimet e filmit. Portretizimi i Uhurës nga Nichols ishte novator për aktoret afrikano-amerikane në televizionin amerikan.
Emri i saj i lindjes ishte Grace Dell Nichols, por që më pas ajo vendosi që ta ndryshojë.
Suksesin e parë e korri në filmin “Porgy and Bess” në vitin 1959.
