41-vjeçari Klementin Islamaj, i cili u arrestua si i dyshuari kryesor i vrasjes së babait të tij, Hysen Ismalaj, akuzohet për veprën penale “Vrasja e kryer në gjendje të tronditjes së fortë psikike”. 69-vjeçari Hysen Islamaj qëlloi disa herë me sëpatë bashkëshorten e tij Shano Islamaj, 66 vjeçe, e cila ndërroi jetë në vend. E gjithë ngjarje ndodhi në sytë e mbesës së mitur, e cila lajmëroi të atin, Klementin Islamaj. Kur ky i fundit u kthye në shtëpi dhe pa nënën e vdekur, shtyu të atin nga shkallët.
Në dëshminë e dhënë përpara autoriteteve lokale, pas arrestimit, 41-vjeçari është shprehur se e ka shtyrë të atin kur ka parë të ëmën e vdekur, por nuk ka pasur si qëllim që ta vrasë. Ai sot u lejua të merrte pjesë në varrimin e prindërve.
NJOFTIMI:
Në vijim të veprimeve procedurale të kryera për ngjarjen e ndodhur ditën e djeshme, në fshatin Shals, Konispol, ku shtetasi H. I., 69 vjeç, në banesë, dyshohet se goditi me sëpatë, në kokë, për motive të dobëta, bashkëshorten e tij, shtetasen Sh. I., 67 vjeçe, e cila si pasojë humbi jetën, Seksioni për Hetimin e Krimeve ndaj Personit arrestoi në flagrancë djalin e tyre, shtetasin K. I., 41 vjeç, për veprën penale “Vrasja e kryer në gjendje të tronditjes së fortë psikike”. Shtetasi K. I. dyshohet se pasi ka parë nënën e tij të pajetë, është konfliktuar fizikisht me babanë e tij, e ka shtyrë atë nga shkallët e banesës dhe si pasojë e dëmtimeve, 69-vjeçari ka humbur jetën.
