Afati i aplikimit për garancinë e parë sovrane do të shtyhet deri më 20 qershor. Deri me tani garancia sovrane është miratuar për 462 biznese dhe me një vlerë financiare prej 5.8 miliardë lekë.
Ministria e Financave ka konsideruar faktin që ka mbetur edhe mbi 5.1 miliardë lekë pa lëvruar, dhe në mënyrë që të ketë sa më shumë përfitues, ka vendosur të shtyjë afatin.
Bizneseve në vështirësi iu dha mundësia që të merrnin kredi për pagat e punonjësve por në asnjë rast vlera mujore bruto e pagës për punonjës nuk duhet të jetë më e lartë së 150 000 lekë.
Fillimisht garancia sovrane ishte me normë interesi 2.85% por më pas u mor përsipër nga shteti interesi, dhe biznesi tashmë do të shlyejë vetëm vlerën e marrë kredi pa normë interesi, brenda 2 viteve.
Në total që në miratimin e garancisë së parë sovrane në vlerën e 11 miliardë lekëve në muaj prill, kanë aplikuar vetëm 712 biznese.
Njoftimi i ministres Anila Denaj:
“Afati i aplikimeve për kredi me Garanci Sovrane 1 është shtyrë deri në datë 20 Qershor.
Për kreditë përmes Garancisë Sovrane për Pagat e sektorit privat, Qeveria Shqiptare:
– subvencionon plotësisht interesat;
– garanton 100% kreditë e aprovuara nga sistemi bankar.
Të dhënat mbi Garancinë Sovrane deri në 05 Qershor”, shkruan Denaj.
