Teksa bota gjendet nën frikën e kërcënimit nga një variant tjetër i koronavirusit, ai i Mbretërisë së Bashkuar, Organizata Botërore e Shëndetësisë deklaron se gjurmë të llojit në fjalë janë zbuluar së paku në 60 vende.
Duket se virusi i ri po ia del të përpijë një pjesë të konsiderueshme të globit, në kohën kur shtetet po përpiqen të frenojnë shkallën e përhapjes së tij.
Nisur nga njoftimi i Organizatës Botërore të Shëndetësisë, rezulton se brenda një jave janë infektuar edhe 10 vende të tjera (kujtojmë se shtatë ditë më parë, shifra e vendeve të prekura nga lloji i ri i Covid-it ishte 50).
Nga ana tjetër, varianti i Afrikës së Jugut, gjithashtu problematik dhe shqetësues ka mundur të përhapet në 23 vende. Po kështu, dy lloje të reja të virusit janë zbuluar në Brazil, ndërkohë që një tjetër është gjurmuar në Kaliforni.
Në kohën kur procesi i shpërndarjes së vaksinave dhe kryerjes së tyre vijon, ekspertët vënë re një problematikë të nxitur nga vetë personat e vaksinuar. Studiuesit theksojnë se pavarësisht vaksinimit është e rëndësishme që të vazhdojë respektimi i distancës fizike, për shkak se vaksina arrin të ofrojë mbrojtje më të mirë 12 deri në 14 ditë pas dozës së dytë, çka nënkupton se efekti i saj nuk është i menjëhershëm.
