Një pasaportë për Covid-19 do të hyjë në përdorim në Francë për shkak të shtimit në masë të rasteve të reja. Duke nisur nga dita e sotme, njerëzit duhet të provojnë se janë vaksinuar, të kenë një test negativ, ose të jenë shëruar së fundmi nga Covid-19 për të hyrë në pjesën më të madhe të muzeve dhe kinemave.
Më vonë ligjvënësit do të vendosin nëse kjo pasaportë do të përdoret nga gushti edhe për të hyrë në kafene, restorante apo qendra tregtare. Kjo vjen një ditë pasi Ministri Oliver Veran njoftoi se janë infektuar 18 mijë persona në vetëm 24 orë. Në brenda një jave është shënuar një rritje me 150%, sepse varianti Delta po përhapet me shpejtësi në të gjithë Francën e jo vetëm.
Presidenti Emmanuel Macron paralajmëroi planin për një pasaportë shëndeti në fillim të këtij muaji, si dhe vaksinimin e detyrueshëm për të gjithë punonjësit e shëndetësisë duke nisur nga muaji shtator.
Mirëpo ky plan i Macron nuk është pritur mirë nga një pjesë e njerëzve, të cilët u ngritën në protesta nuk rregullave të reja të koronavirusit në Francë. Protestuesit shkatërruan dy qendra vaksinimi, duke i cilësuar vendimet e reja si “Diktaturë e shëndetit”.
Duke nisur nga sot, njerëzit nuk do të kenë akses në kinema, teatër, muze dhe nuk do lejohen të udhëtojnë në Disneyland në Paris pa një pasaportë shëndeti.
