Një shumicë e madhe e vendeve europiane kanë kërkuar veprime më të forta nga BE për të frenuar ndryshimet klimatike.
Sipas një dokumenti të zbuluar nga “Reuters”, 20 nga 27 vendet anëtare të BE-së, përfshirë Kroacinë, Gjermaninë, Greqinë, Maltën dhe Holandën, i kanë kërkuar BE-së të rrisë mbikëqyrjen e saj ndaj sistemeve të kujdesit shëndetësor teksa kërcënimet rriten nga moti ekstrem.
“Nëse nuk merren masa sa më parë është çështje kohe përpara se disa sëmundje infektive, të cilat aktualisht janë më të përhapura në rajone të tjera, të bëhen dukuri gjithnjë e më të zakonshme brenda BE-së”, thuhet në dokument.
Ndryshimet klimatike po rrisin rrezikun që sëmundjet infektive të prekin Evropën, pasi verat bëhen më të nxehta dhe më të gjata, dhe rritja e përmbytjeve krijon kushte të favorshme për përhapjen e tyre.
Rreth 61,000 njerëz vlerësohet të kenë humbur jetën në disa vende europiane si pasojë e të nxehtit ekstrem verën e kaluar, duke treguar kështu se gatishmëria e BE-së për të parandaluar skenare të tjera të ngjashme për ngrohjen sipas ekspertëve po dështon.
Ministrat e shëndetësisë të vendeve të BE do të diskutojnë dokumentin në një takim javën e ardhshme. BE-ja aktualisht është duke hartuar vlerësimin e parë të rrezikut klimatik, që do të publikohet vitin e ardhshëm si bazë për politikat e ardhshme për të përballuar rreziqet klimatike si valët e të nxehtit dhe zjarret.
