Rajoni i Atikës në kryeqytetin helen u përfshi të hënën nga flakë katastrofike që morën jetën 87 personave, ndërkohë që shumë të tjerë rezultojnë të zhdukur.
Zona më e goditur ishte padyshim fshati bregdetar Mati, i cili tashmë i ngjan një vendi fantazmë, ku gjithçka duket se është përpirë nga zjarri.
Të mbijetuarit e zjarrit tragjik rrëfejnë tmerrin që përjetuan pasditen e së hënës. Emigranti shqiptar në Athinë, Sokol Prendi tregon për “Top Channel” sesi humbi shtëpinë e tij, por fatmirësisht arriti të shpëtonte familjen dhe miqtë pranë tij.
“Ishim pak të frikësuar s’kishim parë ndonjëherë atë zjarr. Morëm pasaportat e çdo gjë që mund të merrnim lehtësisht. Pasi shpëtuam familjarisht u kthyem të shikonim shtëpinë, edhe me pak ujë ndihmuam kë mundëm. Fatmirësisht nga fqinjët nuk humbi jetën asnjeri. Aktualisht po jetoj te vëllai që jetonte në një zonë tjetër”, tregon ai për Top Channel.
