Piktura e famshme An Arnaut Smoking (Shqiptari duke pirë duhan) e punuar në vitin 1882 nga piktori i njohur francez, Jean-Léon Gérôme, është nxjerrë në shitje në Londër nga shtëpia e famshme e ankandeve, Christie’s. Ditën e sotme pritet të mbyllet ankandi dhe ai që do të ofrojë shumën më të madhe mund ta bëjë të vetën pikturën në vaj.
Vlera fillestare për pikturën është 1.2-1.8 milionë paund, ose ndryshe maksimumi 2.1 milionë euro. Deri më tani nuk ka asnjë informacion rreth shitësit, sepse çdo e dhënë rreth tij është konfidenciale. Ajo që dihet është se më herët kjo pikturë ka kaluar në duart e disa personave të ndryshëm ndër vite.
Në 12 janar 1955 një shitës anonim e ka ofruar pikturën për “Schweitzer Gallery”, në New York, e cila e ka marrë atë në pronësi mes viteve 1960 dhe 1975. Më pas ajo ka kaluar në duart e Andrew Sordonit, në Pensylvania, për t’iu përcjellë më pas Andrew Sordonit III. Ky i fundit më pas e ka shitur në Londër.
Nga viti 1882-2014 piktura ka shëtitur në ekspoizta të ndryshme në Paris, Dayton, Washington D.C dhe Kansas.
Asnjë interesim nga shteti shqiptar për këto piktura
I pari që dha lajmin e daljes së pikturës në ankand ishte historiani Daut Dauti, i cili jeton në Londër. Ai ka ironizuar edhe shtetin shqiptar, duke u shprehur se vlera e veprës prej 2.1 milionë euro nuk është shumë e lartë, duke pasur parasysh sa vjedhin vetë qeveritë.
“Nuk janë shumë pare 2. 1 milonë euro. Janë aq sa i vjedhi qeveria dhe të cilat si duket janë avulluar. E tash mendoni ju vet, se a është ma mirë me vjedhë a me ble piktura që sjellin fitime nga vizitorët?”, shkruan Dauti në rrjete sociale.
I kontaktuar nga gazeta “Koha”, historiani është shprehur se të tilla piktura nga artistë të shquar të huaj ku paraqiten shqiptarët apo peizazhet e vendit tonë kanë një vlerë të jashtëzakonshme. Ai ka thënë se shtetet shqiptare duhet të krijojnë një fond të përbashkët për të blerë këto piktura, që të mos përfundojnë në shtëpi apo galeri private.
“Në Perëndim pikturat i blejnë galeritë që mbahen nga shteti dhe kështu duhet të jetë edhe te ne. Numri i veprave artistike ku paraqiten shqiptarët është shumë më i madh se që mendohet. Me një angazhim serioz këto do të mblidheshin lehtë dhe me pak harxhime për t’u ekspozuar diku te ne, gjë që do të rriste nivelin kulturor dhe do të zgjeronte edhe aspektin turistik”, ka thënë Dauti, duke theksuar se kjo është detyrë e Ministrisë së Kulturës.
Ai ka shtuar se në Shqipëri nuk ka interes në përgjithësi për këto vepra dhe se në vendet perëndimore blihen nga persona të pasur që e duan artin.
“Ne, për fat të keq, nuk kemi miliarderë të këtillë apo nuk kemi njerëz që kanë para dhe dashuri për art. Prandaj, duhet një sensibilizim i iniciuar nga qeveritë tona”, ka thënë Dauti. Ai ka shtuar se duhet të ngrihen fonde shtetërore ose edhe private që të orientohen në blerjen e këtyre veprave.
