Çdo vit, vërshimi i studentëve në fillim të shtatorit shoqërohej me rritje të çmimit të qirave, në kryeqytet. Mund të thuhet se në këtë periudhë të vitit, që përkon edhe me nisjen e sezonit të ri në shkollë, kërkesa për apartamente me qira në Tiranë arrin kulmin.
Megjithatë, sipas agjentëve të tregut, çmimet e qirave kanë mbetur në të njëjtin nivel.
Oferta e lartë për të dhënë shtëpi me qira ka bërë që në këtë periudhë çmimet e qirave të mos rriten, ose të rriten lehtë në zona të caktuara.
Sipas të dhënave nga agjencitë imobiliare, çmimet nga periferia në qendër për shtëpi me qira ndryshojnë me 50 euro. Për apartamentet me hapësirë banimi 1+1, çmimi mesatar është rreth 250 euro, ndërsa në zonat më pranë qendrës, rreth 300 euro. Për sipërfaqe më të mëdha, çmimi varion nga 300 euro deri në 450 euro.
Në zonat elitë, si ish-Blloku, Liceu Artistik, zona pranë Radio Televizionit Shqiptar, çmimi për apartament me qira është mbi 500 euro.
Gjithmonë e më shumë pronarë vendas po lëshojnë shtëpitë e apartamentet e tyre me qira. Ekspertët e tregut thonë si individë të ndryshëm po investojnë në prona të paluajtshme me qëllimin e vetëm lënien me qira. Kryesisht profesionist e lirë si mjekët, dentistët, avokatët e farmacistët kërkojnë banesa të dyta në zonën e Liqenit të Thatë apo Komunës së Parisit.
Sipas numbeo.com, portalit që mat të dhënat për kostot e jetesës, treguesit e banesave, krimit, etj, Shqipëria është e para në rajon për sa i përket kthimit nga qiraja. Treguesi llogaritet si raporti i qirasë vjetore me çmimin e apartamentit dhe shprehet si përqindje. Kthimi vjetor për apartamentet e dhëna me qira në qendër është 3.9%, ndërsa mesatarja e rajonit është 3.5%.
Burimi: Monitor
