Vala e shqiptarëve që po i largohet vendit vazhdon ende. Dhe një nga arsyet e këtij vendimi duket se është jeta e komplikuar që kanë në atdhe.
“Jeta është bërë kaq e komplikuar në ditët e sotme, sa pothuajse nuk mund të gjej rrugën time”.
Është ky pohimi, për të cilin qytetarët evropian janë pyetur nëse bien dakord apo jo, në një sondazh të Komisionit Europian për mbështetjen dhe përjashtimin social.
53% e shqiptarëve janë përgjigjur se bien dakord ose shumë dakord me këtë pohim, përqindja më e lartë nga vendet e Europës dhe tre herë më e lartë sesa mesatarja europiane. Femrat janë më pesimiste sesa meshkujt shqiptarë, me përkatësisht 55% dhe 50%, që kanë rënë dakord me pohimin.
Nga vendet e rajonit, 20% e malazezëve mendojnë se jeta e tyre është e komplikuar, 34% e maqedonasve dhe 30% e serbëve. Më në terezi në Europë e kanë suedezët, vetëm 7% e shohin jetën si të komplikuar dhe gjermanët 8%. Pas nesh, në Europë renditen rumunët me 43%.
Të gjithë shqiptarët nga të rinjtë tek të vjetrit, e shohin jetën të komplikuar, por ata që nuk gjejnë rrugëdalje rezultojnë të moshuarit. 63% e grupmoshës nga 50-64 vjeç dhe 58% e asaj mbi 65 vjeç bien dakord me pohimin se jeta është shumë e komplikuar.
Nga të rinjtë e moshës nga 18-24 vjeç, 34% e shohin jetën të komplikuar, e dyta më e lartë në Europë, pas bullgarëve, me 36%.
Nga sondazhet e mëparshme rezulton se është pikërisht grupmosha e re, që ka një dëshirë të lartë për të emigruar.
Burimi: Monitor
