Pas Luftës së dytë botërore, shqiptarët u përballën menjëherë me një rigjim që do të ishte edhe më i egër dhe fatal. Për 47 vite vendi ynë do izolohej e do kalonte një ndër periudhat më të errta nën regjimin komunist që do sjellte pasojat që ndihen deri në ditët e sotme dhe me siguri dhe për shumë vite të tjera.
Këto 3 dekada demokraci fatkeqësisht kanë dëshmuar se shqiptarët nuk janë qeverisuar nga një politikë shqiptare që të ketë punuar për shqiptarët dhe për interesin kombëtar.
Qytetarët s’kanë besim te politika dhe institucionet
Besimi i qytetarëve shqiptarë në institucionet shtetërore në vend ka rënë ndjeshëm. Ky është rezultati i një sondazhi të përvitshëm që Instituti për Demokraci dhe Ndërmjetësim zhvilloi në 61 bashki në të gjithë vendin.
Rënia e besimit ka përfshirë institucionet e qeverisë, parlamentit, presidentit, partitë politike dhe tek drejtësia. Të anketuarit shprehin rezerva për zyrtarët dhe aktorët politikë duke pretenduar se këta të fundit më shumë se sa nevojat e komunitetit mendojnë për interesat e tyre.
Shqiptarët të dytët në Europë për besimin tek SHBA
Të zhgënjyer prej korrupsionit, tradhëtive, marrëveshjeve të fshehta, skandaleve dhe prej padrejtësive shoqëria shqiptare i ka kthyer sytë drejt EUROPËS DHE SHBA.
Shqipëria është vendi i dytë në Europë me miratimin më të madh ndaj lidershipit të SHBA-ve në Europë. Sipas sondazhit të fundit të Gallup, të botuar më 27 korrik, 67 përqind e shqiptarëve mbështesin lidershipin e SHBA-ve, 20 përqind nuk e mbështesin dhe 13 përqind nuk kanë mendim.
Vendi me besimin më të madh në lidershipin e SHBA-ve në Europë është Kosova me 82 përqind.
Si Saimir Tahiri loboi për të ndaluar komentet nga ambasada e SHBA për çështjen ndaj tij
Një lajm që mund të konsiderohet tronditës në lidhje me besueshmënrinë e shqiptarëve ndaj institucionit të Ambasadës Amerikane, ka qarkulluar në media këto dy ditët e fundit.
Sipas një investigimi të BIRN, Saimir Tahiri ka paguar 20 mijë dollarë që ambasada e SHBA-së në Tiranë të mos komentonte në procesin e tij gjyqësor.
Në një deklaratë plotësuese të dorëzuar në fund të korrikut në Departamentin e Drejtësisë në SHBA, kompania Stone Strategic Solutions Srl, e cila ishte pajtuar në fillim të vitit nga ish-ministri i Brendshëm Saimir Tahiri, sqaron se kishte takuar stafe të dy kongresmenëve dhe senatorit Ted Cruz, si dhe drejtues të Departamentit të Shtetit për Shqipërinë, me të cilët ishte diskutuar “nevoja që personeli i Ambasadës së SHBA të mos komentonte gjatë procesit gjyqësorë të të huajve”.
Në shpjegim po ashtu thuhet se përfaqësuesve të Departamentit të Shtetit u është bërë me dije ndikimi i madh që ambasada kishte në gjykatat shqiptare, ndërsa mësohet se Tahiri pagoi 20 mijë euro për lobimin që u bë i ditur në fillim të vitit.
A duhet të kenë më besim të verbër tek SHBA shqiptarët?
Pyetja e madhe që ngrihet në këtë rast është se çfarë impakti ka kjo ngjarje tek shqiptarët që i besojnë amerikanëve më shumë se ligjvënësve që i votojnë vetë. A po ju shitet vallë sapuni për djathë?
Në një kohë kur ndodhin lobime të tilla për këtë çështje delikate, çfarë duhet të presin shqiptarët për çështjet më të rëndësishme si për Reformën në Drejtësi dhe Vettingun në Politikë?
A mos ka ardhur tashmë koha që të rrëzohet miti se SHBA është gjithmonë aty për shqiptarët dhe shtetin e tyre?
Investigimi i nxjerrë së fundmi nga BIRN në lidhje me lobimin e ish-ministrit të Brendshëm Saimir Tahiri tek Ambasada Amerikane, nuk është as rasti i parë dhe as i fundit që vë në pikëpyetje raportin e SHBA-së me shqiptarët.
