Në mjaft shtete të botës, veçanërisht në Amerikë praktikohet regjistri publik për abuzuesit seksualë dhe pedofilët! Kjo do të thotë që çdo qytetar mund të aksesojë të dhënat për identitetin e personave të dënuar për përdhunim në lagjen ku banon ose ku dëshiron të banojë.
Për shembull nëse ti ndryshon lagjen dhe dëshiron të shkosh diku tjetër, falë këtij regjistri mund të shohësh nëse aty banon një ish-i dënuar për krime të tilla. Një ide e tillë mund të jetë shumë e nevojshme edhe në vendin tonë, veçanërisht pasi rastet e abuzimeve seksuale janë rritur më shumë se kurrë.
Zakonisht rastet e abuzimeve seksuale dhe përdhunimeve janë të përsëritura ndaj falë një regjistri të tillë mund t’u ofrojmë të miturve, adoleshenteve, të rriturve, prindërve të fëmijëve, një shans për një jetë më të sigurt.
Për të pasur një regjistër të tillë publik për abuzuesit është ngritur edhe një peticion online në të cilin mund të votoni, duke klikuar këtu.
“Fatkeqësisht, deri në momentin që rastet e abuzimit seksual denoncohen ose bëhen publike, është tepër vonë. Abuzuesit shpesh herë kanë histori abuzimi të njohur nga bashkëqytetarët e tjerë. Regjistri publik, mund të parandalojë rastet e përsëritura, dhe mund të krijojë një mjedis më miqësor për viktimat dhe të inkurajojë denoncimet në kohë. Ne besojmë që njerëzit kanë të drejtë të dinë nëse në zonën e tyre ka persona të cilët përbëjnë rrezik për ta dhe të afërmit e tyre. Siguria e fëmijëve të pafajshëm apo njerëzve të tjerë, është me e rëndësishme se e drejta e abuzuesve për privatësi”, thuhet në vijim të peticionit.
Në peticion propozohet që lista vendore e emrave të regjistruar si abuzues seksualë të koordinohet nga organet kompetente si Policia e Shtetit dhe Ministria e Drejtësisë dhe të lejohet çdo qytetar të kërkojë të dhënat e dhunimit bazuar në identitetin dhe vendndodhjen e çdokujt.
https://www.instagram.com/p/CA9o8muA8on/
