Shqipëria po plaket shumë shpejt dhe kjo gjë është dalluar sërish sipas të dhënave të 3-mujorit të parë të 2017-s. Nga statistikat e INSTAT del se ka pasur më pak lindje sesa 2016, në tre muajt e parë të 2017 dhe më shumë vdekje.
Berati ka pësuar rënien më të madhe të lindjeve dhe Dibra ka pasur rritje të numrit të vdekjeve krahasuar kjo me tre muajt e parë të 2016.
Nga të dhënat zyrtare, shtesa natyrore e popullsisë ka pësuar një rënie me 33.6% dhe plakja e popullsisë po bëhet më e dukshme. Numri i lindjeve në të gjithë vendin për tre muaj ishte 6880, duke shënuar një rënie me 4.0%. Gjirokastra regjistron numrin më të ulët të lindjeve me 134 dhe numrin më të madh Tirana me 2087 lindje.
INSTAT raporton se Tirana dhe Vlora janë dy qarqet e vetme që pësuan një rritje të numrit të lindjeve në tre muajt e parë të këtij viti, por ajo është e vogël krahasuar me tremujorin e parë të 2016-s.
Rënia me e madhe e lindjeve nga viti i kaluar e ka pasur Berati me 14.3%. Por nga ana tjetër është rritur numri i vdekjeve me 2.6%, ku në tre muaj të 2017-s kanë vdekur 6031 persona.
Tirana ka pasur më shumë vdekje 1448, por rritja nga viti i kaluar ka qenë më e madhe në Dibër me 7.8%. Elbasani është qyteti i vetëm i cili ka pasur rënie të numrit të vdekjeve në këto tre muaj.
