Në Shqipëri regjistrohen rreth 450 raste të të sëmurëve me kancer në vit dhe shkaktarët kryesorë janë pesticidet që u hidhen produkteve bujqësore por dhe kimikatet që janë në përbërje të objekteve të ndryshme.
Në Kongresin e 13-të të sëmundjeve të gjakut është theksuar se në Shqipëri regjistrohen qindra raste çdo vit, duke mos bërë më dallim nga shtetet që e kanë ndezur sinjalin e alarmit.
Kreu i Shoqatës se Mjekëve, Arben Ivanaj kërkoi që të bëhet më shumë kujdes me përzgjedhjen e mallrave të konsumit.
“Janë të gjithë agresivët e ambientit, si produktet kimike pa përjashtim. Qoftë parfumeria, pesticidet, qoftë medikamentet janë një agresion ndaj organizmit. Shtimi i faktorëve agresivë ndaj shëndetit tonë në jetën e përditshme dhe rritja e sensibilitetit dhe regjistrimit të këtyre sëmundjeve, ka bërë që të kemi një shtim relativ të këtyre të sëmurëve dhe në Shqipëri ashtu siç konstatohet në vendet e tjera të Europës”.
Cilësia e jetës dhe të jetuarit shëndetshëm është shumë e rëndësishme thotë Ivanaj, i cili këshillon se duhet të ruhemi nga gjërat abuzive të tepërta dhe të merremi me sport.
Shqipëria tashmë është përfshirë në hartën e vendeve ku është ndezur sinjali i kuq.
/Ora News
