Interpretimi i Linda Halimit në natën e parë të gjysmëfinaleve të “Eurovision”-it ishte shumë i mirë dhe u vlerësua.
Me këngën “Botë”, ajo përfaqësoi Shqipërinë në edicionin e këtij viti që u mbajt në Ukrainë, teksa në natën e parë garuan 18 shtete, me Lindën që interpretoi e katërta.
Gjithsesi, këngëtarja shqiptare nuk arriti të kualifikohet për në natën finale, duke i dhënë fund garës së saj, që në natën e parë të konkurrimit. Vetë këngëtarja reagoi menjëherë pas skualifikimit.
“Jam përgjithmonë mirënjohëse për këtë mundësi të jem në skenën gjigande të Eurovision-it. Faleminderit të gjithëve për këtë eksperience të bukur! Kam kaluar për mrekulli! Fat vitin tjetër Shqipëria ime”, shkroi këngëtarja.
Më 11 maj është nata e dytë gjysmëfinale, ndërsa të shtunën është finalja e “Eurovision”-it.
Gjatë ditëve të provave në Kiev, këngëtarja shqiptare ka marrë vlerësime për potencën vokale.
Në performancën e saj të sotme, Linda, krahas vokalit, shkëlqeu edhe përmes gurëve të shndritshëm në ngjyrë argjendi, të cilët zbukuronin veshjen e dizajnuar nga Joni Peçi, por pavarësisht të gjithave, nuk arriti të bindë publikun europian për ta votuar për në finale.
