Shqipëria përballet sot me Italinë në një miqësore luksi, që do t’i shërbejë trajnerit Reja apo pasardhësit të tij, për të kuptuar gjendjen e futbollistëve para eliminatoreve të Euro 2024 në raport me një kombëtare të madhe.
Italianët nuk janë pjesë e Botërorit, ndaj do të provojnë disa të rinj në ekip. Por ndërkohë, edhe në radhët e Shqipërisë ka ndryshime të mëdha si pasojë e mungesave.
Kështu, trajneri Reja ka vendosur që të vendosë në mbrojtje Mihajn si titullar përkrah Kumbullës e Ismajlit, ndërsa krahët do të jenë me Hysajn e Lenjanin.
Kombëtarja shqiptare kaloi në avantazh e para. Pas një goditje dënimi Ismajli fluturoi mbi mbrojtësit e Italisë dhe me kokë mposhti portierin Meret i cili mbetet i palëvizur.
Por, zgjati shumë pak festa kuqezi. Pas një rivënie anësore, mbrojtja e kombëtares tonë nuk ishte e pozicionuar mirë dhe Di Lorenco tund rrjetën duke barazuar shifrat.
Shqipëria pësoi sërish gol në minutën e ‘25. Raspadori kaloi me lehtësi Kumbullën dhe pasoi për Grifon i cili i vetëm çoi topin në portën e Berishës. 1-2 rezultati.
Gjithashtu, kujtojmë se Policia ka njoftuar planin e masave për miqësoren mes Shqipërisë dhe Italisë që do të zhvillohet pasditen e sotme në stadiumin “Air Albania”.
Në kuadër të masave për mbarëvajtjen e ndeshjes nga ora 18:00 do të bllokohen disa akse rrugore, konkretisht rruga “Lekë Dukagjini”, përreth stadiumit; rruga “Dervish Hima”; rruga “Gjergj Filipi”; rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”.
“Policia e Tiranës kërkon mirëkuptimin e tifozerive respektive, për zbatimin e detyrimeve të mësipërme, si dhe mirëkuptimin e qytetarëve për të evituar lëvizjen me automjete, në segmentet rrugore të lartpërmendura, nga ora 18:00 deri në përfundim të aktivitetit”, thuhet në njoftimin e policisë.
