Të rriturit të diagnostikuar me çrregullim të hiperaktivitetit të deficitit të vëmendjes (ADHD) mund të kenë një jetëgjatësi më të shkurtër se ata pa një diagnozë të tillë, sipas një studimi të ri që disa ekspertë e kanë quajtur “shqetësues”.
ADHD është një gjendje e karakterizuar nga shqetësimi, vështirësitë me përqendrimin dhe të vepruarit me impuls, sipas Shërbimit Shëndetësor Kombëtar të Mbretërisë së Bashkuar (NHS), ku më së shpeshti diagnostikohet te fëmijët nën moshën 12 vjeç.
Në një studim të parë në botë, studiuesit krahasuan më shumë se 30,000 të rritur në Britani me ADHD me më shumë se 300,000 njerëz pa të.
Hulumtimi u bazua në të dhënat anonime të kujdesit parësor nga 2000 deri në 2019.
Studimi zbuloi se burrat e diagnostikuar me ADHD kishin një jetëgjatësi që u zvogëlua me 4.5 deri në 9 vjet, dhe grave me ADHD u reduktua jetëgjatësia nga 6.6 deri në 11 vjet krahasuar me ato pa diagnozë.
Josh Stott, autor i hulumtimit tha se ishte “thellësisht shqetësuese” që disa të rritur me ADHD “po jetojnë jetë më të shkurtër se sa duhet”.
“Njerëzit me ADHD kanë shumë pika të forta dhe mund të lulëzojnë me mbështetjen dhe trajtimin e duhur. Megjithatë, shpesh atyre u mungon mbështetja dhe kanë më shumë gjasa të përjetojnë ngjarje stresuese të jetës dhe përjashtim social, duke ndikuar negativisht në shëndetin dhe vetëvlerësimin e tyre”, tha ai në një deklaratë.
Studiuesit paralajmëruan se ADHD tek të rriturit shpesh është nëndiagnostikuar, kështu që studimi mund të mbivlerësojë reduktimet e jetëgjatësisë, duke shtuar se nevojiten më shumë kërkime.
Studiuesit thanë në studim se reduktimi i jetëgjatësisë ka të ngjarë të shkaktohet nga “faktorët e rrezikut të modifikueshëm dhe nevojat e paplotësuara të mbështetjes dhe trajtimit” të ADHD dhe kushteve të tjera të shëndetit mendor dhe fizik.
