Ushtarakët që u përfshinë në operacionin e përmbytjeve disa ditë më parë do të shpërblehen. Në një ceremoni në ambientet e Ministrisë së Mbrojtjes, kryeministri Edi Rama bëri të ditur se nga viti i ardhshëm do të akordohet edhe një rritje e konsiderueshme pagash për ta.
“Ditëlindjen e 105-të e Forcave të Armatosura nuk mundëm ta celebronim në mënyrën tradicionale, sepse e kaluam në operacionet e shumta si pasojë e reshjeve dhe prurjeve të jashtëzakonshme të lumit të Vjosës, të cilat sollën dëme dhe kërcënuan jetë njerëzish…
Duke qenë se në 4 dhjetor situate nuk na dha mundësinë të mblidhemi së bashku, jam këtu sot për t’u uruar të gjithëve ju festën e Forcave të Armatosura, e cila nuk mund të kremtohej në mënyrën më kuptimplotë sesa në vijën e parë ku të gjithëve ju çoi në 4 dhjetor detyra”, tha Rama.
Duke shprehur edhe një herë mirënjohjen për Forcat e Armatosura, Rama u shpreh se qeveria ka vendosur t’i shpërblejë në fundvit, ndërsa vitin e ardhshëm për ta do të ketë edhe pagë më të lartë:
“Sot, qeveria do të vendosë një shpërblim si shprehje mirënjohjeje për të gjithë ata që u përfshinë në operacionin fantastik që shteti përballoi, në mënyrë që të gjitha familjet e ushtarakëve, në radhë të parë të atyre që ishin në vijën e zjarrit, të ndihen mirë në këtë fundviti. Dua të angazhohem sot para jush që viti 2018 do të jetë viti i fundit që do të ketë rrogat ekzistuese për ju. Ne jemi të vendosur të rrisim buxhetin e ushtrisë. Vitin e ardhshëm do të akordohet rritje e konsiderueshme pagash për ushtarakët”.
