Shpat Kasapi po rikthehet fuqishëm në qendër të vëmendjes, por këtë herë jo me një projekt muzikor. Emri i tij po qarkullon me shpejtësi në prapaskenat e televizionit, pasi burime pranë “Prive by Liberta Spahiu” konfirmojnë se këngëtari është shumë pranë hyrjes në edicionin e pestë të “Big Brother VIP Albania”.
Sipas informacioneve të siguruara, negociatat mes Kasapit dhe produksionit thuhet se kanë përfunduar dhe këngëtari ka dhënë dritën jeshile për t’u bërë pjesë e reality show-t më të ndjekur në vend. Bisedimet, që prej ditësh kanë qenë “sekreti më i hapur” i Tiranës, duket se janë mbyllur me sukses.
Por ky rikthim vjen në një periudhë të ngarkuar emocionalisht për Shpatin. Spekulimet për krisje në martesën e tij me Selvijen fillimisht nisën si thashetheme, por u shndërruan në lajm të konfirmuar: çifti është ndarë dhe procedurat e divorcit janë finalizuar. Kjo e ka vendosur këngëtarin në qendër të interesit publik, duke shtuar kureshtjen për çdo hap të tij.
Nëse Kasapi do të hyjë realisht në shtëpinë e famshme, pritet që pikërisht jeta e tij private të bëhet një nga temat më të përfolura të sezonit. Publiku mezi pret të zbulojë nëse ai do të zgjedhë të flasë hapur për fundin e martesës, për çfarë ka kaluar gjatë muajve të fundit dhe për versionin e tij të ngjarjeve që kanë sjellë shumë debat në rrjete.
Ndërkohë, Selvija ka hedhur poshtë mundësinë për të qenë pjesë e formatit, duke theksuar se nuk ka asnjë interes për ekranin në këtë moment.
