Ditën e sotme është përfolur se një gazetare e Radio Televizionit Shqiptar është rrëmbyer dje nga tre persona në Prishtinë. Ka qenë një raport i brendshëm i Policisë së Kosovës, i publikuar nga gazeta “Insajderi”, i cili ka bërë me dije se është rrëmbyer një person, në makinën e së cilës është gjetur një kartë identiteti e një gazetareje të RTSH-së.
“Tre dëshmitarë të kombësisë shqiptare kanë raportuar se tre persona të panjohur e kanë futur me forcë në makinën e tyre një grua dhe më pastaj janë larguar”, shkruhet në raportin e Policisë së Kosovës.
Gjithashtu Policia e Kosovës ka konfirmuar se ka gjetur një makinë, e cila besohet se i përket personit të rrëmbyer. Pikërisht në këtë makinë është gjetur edhe karta e identitetit, e cila i përket një gazetareje të RTSH-së.
“Policia e Kosovës ka shkuar në vendin e ngjarjes dhe ka gjetur një veturë që besohet t’i takojë gruas së kidnapuar. Policia e Kosovës gjeti brenda mjetit një kartë identifikuese të një gazetareje të Radio Televizionit Shqiptar”, theksohet më tej në raportin e Policisë së Kosovës.
Pas këtij lajmi drejtori i informacionit të Radio Televizionit Shqiptar, Bledar Zaganjori, ka reaguar për gazetën “Insajder” duke thënë se RTSH-ja nuk ka asnjë informacion që një gazetare e tyre është rrëmbyer dje në Kosovë.
“Nuk kemi asnjë informacion që ndonjë gazetare e Radio Televizionit Shqiptar është kidnapuar të hënën në Prishtinë. Ne nuk kemi dërguar asnjë gazetar apo gazetare për çështje pune në Kosovë gjatë këtyre ditëve”, është shprehur Zaganjori.
