Një grua nga Durrësi është bërë nënë për herë të dytë brenda një viti dhe nuk e dinte aspak që po priste fëmijë.
Gruaja rreth të 30-tave shkoi në urgjencën e spitalit të Durrësit një natë më parë, me një të afërmen e saj, duke kërkuar ndihmë të menjëhershme për shkak se dhimbjet e barkut ishin gjithnjë e më të padurueshme.
Sipas Panoramës, pas ekzaminimit fillestar mjekët e pyetën nëse ishte shtatzënë, por ajo dhe e afërmja që e shoqëronte e mohuan kategorikisht, duke u përgjigjur se vetëm një vit më parë kishte lindur fëmijën e parë.
Gjithsesi, mjekët e dërguan menjëherë për një vizitë gjinekologjike nga ku rezultoi se jo vetëm ishte shtatzënë, por dhe gati për të lindur.
Menjëherë iu drejtua maternitetit dhe pak orë më vonë lindi një fëmijë, që për mrekulli rezultoi i shëndetshëm.
Ndonëse duket e pazakontë, gruaja nuk e dinte se ishte në pritje të një fëmijë pasi nuk i ishte nënshtruar kurrë një kontrolli më parë.
Aktualisht si nëna dhe bebi janë mirë, por më të shokuar nga e gjithë kjo histori kanë mbetur mjekët.
