Ngjarjet tronditëse të përdhunimit të 27-vjeçares Adriana, e cila denoncoi rastin e saj në emisionin “Dua të të bëj të lumtur”, kanë ndodhur brenda institucionit, ku Antonjeta Pero, e vetëdeklaruar si psikologe punon.
Urdhri i Psikologut bëri me dije se Pero “nuk ka qenë apo është antare e Urdhrit të Psikologut dhe as psikologe e licencuar”. (Lexo këtu)
Ditët e fundit, ‘psikologia’ e vetëshpallur tërhoqi vëmendjen me statuset e saj në Facebook, ku akuzonte për mashtrim Adrianën.
Në një intervistë për emisionin e mëngjesit “Kafe Shqeto”, ajo madje është shprehur se pas Adrianës fshihen persona të tjerë që kanë përfitime mediatike/politike ndaj Shtëpisë së Fëmijës dhe po e përdorin 27-vjeçaren.
Pikërisht për shkak të mungesës së provave të mjaftueshme për abuzimin, është lënë i lirë edhe shefi i policisë së Fushë Arrëzit, i cili u akuzua se abuzoi me Adrianën kur kjo e fundit shkoi të denonconte përdhunimin. Arrestimi u bë pas kallëzimit të vajzës, ne prani te nje psikologu, por sipas prokurorisë, nuk ka prova të mjaftueshme që e shpallin fajtor Izmir Durakun.
Të kthehemi tek Antonjeta Pero.
“Xing.al” ka publikuar statuse të vjetra të sajat në Facebook, të cilat kanë shokuar opinionin publik.
Deklaratat e saj nuk janë shumë të dyshimta për një psikologe dhe profesioniste të shëndetit mendor.
Madje, disa ditë më parë ajo ndau në profilin e saj një status ku tregonte se e kujt ishte përgjegjësia kur fëmijët ktheheshin në skllavë seksualë.
“Skllavëria seksuale e të miturve vjen prej mungesës së prindërimit dhe punës së dobët të stafeve pedagogjike në drejtim të komunikimit dhe fuqizimit të fëmijëve në të drejtat e tyre”.- shkruante Pero më 3 qershor.
Mirëpo, pas denoncimit të ngjarjes duket se ajo ndryshoi mendje, duke u përpjekur të mbrojë statusin e saj dhe të akuzojë për mashtrim 27-vjeçaren.
Sipas “Xing.al”, Pero ka reaguar në një status ku thotë që ka 2 diploma, një në vitin 1996 dhe një në vitin 2000, por nuk e ka parë të arsyeshme të licensohet tek Urdhri i Psikologut.
Në komente, psikologen e kanë pyetur në cilën degë dhe universitet është diplomuar, por ajo jo vetëm që ka refuzuar të përgjigjet, por ka fshirë edhe komentet.
Burime për “Xing.al” kanë treguar se Pero ka punuar si mësuese muzike në shkollën Vasil Shanto në Shkodër.
