Greqia ka regjistruar tre viktima të tjera nga COVID-19, duke e çuar numrin total të vdekjeve në 20.
Por përpos këtyre lajmeve negative që na vijnë nga shteti fqinj, duhet të themi se rreth 35 persona kanë lënë spitalet pasi janë shëruar plotësisht nga sëmundja.
Numri i përgjithshëm i rasteve të diagnostikuara me koronavirus tani është 743 në të gjithë vendin, me 48 raste të reja të konfirmuara në 24 orët e fundit.
Shumica e rasteve vazhdojnë të regjistrohen në rajonin e Atikës, dhe shumica e viktimave janë meshkuj.
Sotiris Tsiodras, zëdhënësi i Ministrisë së Shëndetësisë tha të hënën se sipas modeleve të tyre matematikore, autoritetet greke besojnë se afërsisht tetë deri në dhjetë mijë njerëz duhet të jenë infektuar me virusin në Greqi deri më tani.
Presidentja e re e Republikës së Greqisë, Katerina Sakellaropoulou, pritet të mbajë një fjalim televiziv drejtuar grekëve këtë pasdite me rastin e festës kombëtare të 25 Marsit.
Mesazhi i saj nuk do të jetë vetëm një mesazh përkujtimor për 199-vjetorin nga fillimi i revolucionit të vitit 1821 kundër Perandorisë Otomane , por do t’ju referohet edhe zhvillimeve aktuale për koronavirusin.
