Sonila Meço është gjobitur nga Inspektorati Shtetëror Shëndetësor, pasi ka shkelur rregullin duke ftuar më shumë se një person në studion e emisionit Tempora.
Moderatorja ka reaguar ashpër për këtë vendim, duke iu drejtuar qeverisë me akuzën se ajo vetë ka shkelur ligjin duke mbajtur mbyllur shqiptarët për 30 ditë deri më 23 qershor, në mënyrë antikushtetuese.
“Qeveri që ka shtyrë gjendjen e emergjencës së fatkeqësisë natyrore deri në datë 23 qershor, mbi 30 ditë në mënyrë antikushtetuese. Unë kam shkelur rregullin me një njeri për tre orë, qeveria me të gjithë shqiptarët për 30 ditë. Gjobë, ndërsa bëjmë detyrën për të informuar publikun edhe mbi masat jo ligjore dhe antikushtetuese të autoriteteve. P.sh a ka mundësi të na shpjegojë qeveria mbi çfarë argumentimi shkencor ka vendosur të ketë vetëm dy persona në studio televizive? Megjithëse në respektim të distancave dhe masave mbrojtëse? Kur në institucione brenda një zyre shumë herë më të vogël gjenden më shumë se dy persona? Në parukeri, fasoneri, dyqane e qendra tregtare?”, shkruan ndër të tjerash gazetarja në Facebook.
Në një njoftim të dytë në Instagram, ajo i drejton disa pyetje publikisht kryeministrit Edi Rama i cili nuk ka pranuar për intervistë pavarësisht përsëritjes së ftesës publike në program:
Pyetjet e Sonila Meços drejtuar kryeministrit Rama:
Në mungesë të një përgjigjeje për ftesën në studio, pas përsëritjes së ftesës publike në program, nga pamundësia e hapjes së linkut të programit nëpërmjet facebook-ut, Tempora i dërgoi këto pyetje kryeministrit:
1. Pse vijon mbajtja e fashave orare pa një shpjegim shkencor dhe kush ka bërë propozimin për mbajtjen e orës 17.30 si kufirin e lirisë edhe pas hapjes së ekonomisë?
2. Përse nuk merren masa të diferencuara për lëvizjen e kategorive më riskore dhe pse nuk lejohet shëtitja në respektim të distancës fizike pas orës 17.30 për të lehtësuar imunitetin e dobësuar nga qëndrimi mbyllur për një kohë të gjatë?
3. Nëse bizneset hapen, por kjo hapje nuk përkon me mundësinë e lëvizjes së lirë të njerëzve, lind dyshimi për efikasitetin e masës dhe qëllimin e fshehur se hapja e bizneseve ndërsa njerëzit rrinë mbyllur bëhet për t’i privuar ato nga ndihma financiare e shtetit. Pse mbahet kjo masë?
4. Pse nuk publikohet lista e plotë e personave që kanë përfituar pagën e luftës dhe sa para ka shpërndarë shteti për punojësit e bizneseve të mbyllura për shkak të pandemisë?
6. Pse “paga e luftës” destinohet vetëm për subjektet e mbyllura me urdhër nga qeveria, kur edhe ato që mbetën të hapura me urdhër kanë mbyllur aktivitetin për shkak të zinxhirit ekonomik, si furnitorë, apo nga mungesa e klientëve?
7. Pse fondi i garancisë sovrane duhet të përdoret me urdhër qeverie nga bizneset vetëm për pagat e punonjësve dhe jo për ruajtjen e qarkullimit dhe aktivitetit, për të mbrojtur rentabilitetin e ekonomisë?
8. Nëse sipas jush Shqipëria ka marrë masat më të forta shtrënguese, por efikase për parandalimin e përhapjes së COVID-19, atëherë përse ka ofruar paketën më të vogël financiare krahasuar me vendet e rajonit, sic sugjeron lista e FMN-se?
9. Përse vajtja në plazhe në kushtet e rritjes së temperaturave duhet të kushtëzohet si lëvizja në zona të mbyllura dhe cili është plani i Shqiperisë për hapjen e turizmit, kur vendet e rajonit rrotull nesh tashmë e kanë shpallur prioritet të rëndësishëm?
