Altin Basha është liruar nga detyra si drejtor i Teatrit Kombëtar.
Basha, i cili e mori detyrën si drejtori i Teatrit Kombëtar dy vite më parë, është shkarkuar me vendim të Këshillit të Ministrave.
Ministria e Ekonomisë, Kulturës dhe Inovacionit ka caktuar si drejtues të përkohshëm të këtii institucioni, Indrit Çobanin.
Me propozimin e Ministrisë së Ekonomisë, Kulturës dhe Inovacionit, Këshilli i Ministrave liroi nga detyra Drejtorin e Përgjithshëm të Teatrit Kombëtar, Altin Basha. Pas këtij lirimi MEKI do të çelë një proces përzgjedhjeje për drejtues të ri të TK. Ndryshimi synon në përmirësimin e nivelit drejtues dhe të cilësisë së mirëmenaxhimit ekonomiko-financiar dhe administrativ, rritjen e transparencës institucionale dhe sjelljen e një fryme të re komunikimi publik dhe bashkëpunimi ndaj komunitetit artistik e profesional. Me zbardhjen e vendimit, MEKI do të komandojë si drejtues të përkohshëm z Indrit Çobani.
Ai dyshohet se ka abuzuar me fondet e teatrit, dhe më konkretisht bëhet fjalë me kostumet e shfaqjes “Vojçek”. Basha ia kishte besuar kostumet bashkëshortes së tij Ilirjana, e cila i siguronte kostumet me kosto më të lartë. Skandali u publikua në një emision investigativ dhe verifikimet nisën më 23 dhjetor 2024 nga Ministria e Ekonomisë, Kulturës dhe Inovacionit e cila kishte ngritur një grup të posaçëm për të vërtetuar të gjitha pretendimet e ngritura.
