Kapiteni i Manchester United, Harry Maguire u kthye në lajmin kryesor të gushtit me sherrin ku u përfshi disa ditë më parë në ishullin grek të Mykonosit.
Ai u shoqërua në polici në ishullin grek, pasi u përfshi në një sherr për të ndihmuar të motrën, e cila ishte ngacmuar dhe më pas plagosur në krah nga një biznesmen shqiptar.
Ylli i Manchester United ishte me partneren Fern Hawkins në një bar në Mykonos të enjten kur motrës së tij Daisy iu afrua një grup burrash shqiptarë.
Njëri nga burrat – i përshkruar nga burimet si “gangster” – filloi të bisedonte me Daisy-n dhe kur ajo e refuzoi, ai i nguli në krah një mjet të mprehtë metalik. Harry më pas ndërhyri dhe nisi sherri.
Sipas avokatit, shqiptari i kishte injektuar drogë në mënyrë që ta përdhunonte.
Së fundmi, mediat ndërkombëtare kanë zbardhur detaje të reja nga ngjarja, duke shkruar se anglezi ka tentuar të korruptojë policët grekë dhe u kishte bërë presion, duke thënë: “A e dini kush jam unë? Jam kapiteni i Manchester United, jam shumë i pasur, mund t’ju jap para, mund t’ju paguaj, ju lutem më lini të shkoj.”
Madje efektivi që e prangosi ka deklaruar se futbollisti e shtyu fort, duke bërë që ai të rrëzohej dhe të lëndonte shpinën.
Nga ana tjetër, mësohet se gjatë rrugës për në Komisariat, Maguire dhe grupi i tij kishin kërkuar të shoqëroheshin në spital por kërkesa i ishte refuzuar nga efektivët, madje kapiteni i United pretendon se një oficer e goditi me shkelm në këmbë dhe i tha: “Karriera jote ka marrë fund”.
