Qendrat e masazhit që ofrojnë shërbime “ekstra” në këmbim të parave janë kthyer në një fenomen mjaft shqetësues këto vitet e fundit. Pavarësisht se ka pasur dhjetëra denoncime e raste që kanë përfunduar pas hekurave, këto qendra vazhdojnë ende të përhapen në kryeqytet si kërpudhat pas shiut. Shumë raste të tilla janë zbuluar nga emisionet investigative dhe ende nuk është arritur që kjo gjë të marrë fund një herë e mirë.
Seks oral dhe video erotike nga masazhatoret
Vajza të reja të kamufluara si masazhatore, ushtrojnë prostitucion në këto qendra masazhi dhe vetëm 2 ditë më parë është zbardhur një rast i ri në media. Gazeta Si ka zbuluar nga dosjet e policisë, se si funksionon një nga këto qendra, që përveç masazheve, ofronte edhe seks në shkëmbim të parave.
“Në orën 19.00 në qendër erdhi një klient. Fillimisht kërkoi masazh, pasi bëri masazh klienti kërkoi marrëdhënie. Në këtë moment e telefonoi e fejuara dhe i kërkoi të flasë me kamera dhe klienti doli me shpejtësi nga qendra pa kryer aktin seksual, kurse në krevat la 5 mijë lekë”, ka rrëfyer njëra nga masazhatoret për policinë.
Vajzat kanë treguar se ishte punëdhënësi ai që u kishte kërkuar që veç masazhit të ofronin shërbime seksuale edhe te shokët e tij. Masazhatoret kanë thënë se pagesa e klientëve për marrëdhënie seksuale shkonte 7 mijë lekë, ndërsa për seks oral dhe masturbim nga 2 mijë deri në 3 mijë lekë. Madje historia me to ka shkuar aq larg, sa kanë treguar se përveç shërbimeve, dërgonin edhe video erotike tek njerëz të ndryshëm në ‘Sanpchat’, të cilët i paguanin më vonë përmes llogarive bankare.
Problem shqetësues i zbuluar prej vitesh
Këto qendra të licencuara si qendra masazhi apo SPA, që vetëofrohen edhe për shërbime ekstra kanë nisur si aktivitetet kryesisht gjatë vitit 2016-të. Si fillim disa prej tyre u bënë publik nga emisionet investigative, të cilat shpesh kanë sjellë edhe pamje brenda qendrave të masazhit.
Këto qendra janë zbuluar nga agjentë të infiltruar, të cilët hyjnë brenda tyre si klientë dhe kërkojnë marrëdhënie seksuale. Në rastin e fundit thuhet se sapo agjentit i është propozuar nga punonjësja shërbim ekstra, në këto ambiente kanë mësyrë edhe agjentët e tjerë për të kryer kontroll dhe më tej referimin e çështjes në prokurori. Deri më tani janë zbuluar vit pas viti me dhjetëra raste të qendrave të masazhit të cilat rekrutojnë vajzat e reja nga mosha 20-35 vjeçe përmes njoftimeve për punë në faqet e internetit apo gazeta.
Një pjesë e mirë e vajzave që kanë rënë pre e tyre, kanë treguar se nuk kanë folur që në fillim për shërbimet “ekstra”, por më pas gjatë punës mësojnë se duhet të ofrojnë seks përveç masazheve. Këto qendra masazhi, shpesh janë kthyer shqetësim edhe për qytetarët e zonave ku kanë qenë të hapura dhe madje para disa muajsh ishin vetë banorët e një pallati në Selitë që bënë denoncimin për një qendër masazhi pranë emisionin “Fiks Fare”.
Çdo arrestim i qendrave të mesazhit ka qenë i bujshëm, por përveçse të shiten si operacione super të suksesshme nga ana e policisë, duhet bërë më shumë punë në këtë drejtim, përderisa çdo muaj zbulohen të tilla baza prostitucioni.
