Është shënuar viktima e parë nga Koronavirusi në Shqipëri.
E moshuara 73-vjeçare që ishte shtruar në Durrës, ka humbur jetën në përpjekje për t’u dërguar në Tiranë për mjekim më të specializuar.
73-vjeçarja ishte kthyer para 10 ditësh nga Italia, ku dyshohet se është infektuar me virusin COVID-19.
Mjekët u bënë gati ta nisin për në Tiranë zonjën, por e rifutën atë në spital menjëherë, pasi sipas “Abcnews”, shëndeti i gruas ishte përkeqësuar menjëherë.
Gruaja vuante nga probleme shëndetësore me veshkat dhe zemrën dhe gjendja shëndetësore ishte shumë kritike.
Por ajo që është më tepër shqetësuese tani është fakti që e moshuara kishte kontakte me shumë të afërm dhe mjekë që e vizitonin në spital, para se të konfirmohej se vuante nga virusi COVID-19.
Ministria e Shëndetësisë ka konfirmuar sot dy raste të reja të infektuara me virusin COVID-19.
Në një njoftim për shtypin, zëvendësministrja e Shëndetësisë, Mira Rakacolli njoftoi se janë analizuar 43 testime të reja dhe nga këto kanë rezultuar pozitivë dy persona.
Njëri prej tyre është i lidhur me rastin e parë me Koronavirus ndërsa i dyti është një i moshuar në Lushnjë që ka udhëtuar në Bergamo, Itali.
/Iconstyle.al
