Është shënuar një tjetër viktimë nga koronavirusi në vendin tonë, pasi mësohet se ka ndërruar jetë te Spitali Infektiv një 90-vjeçar, duke e çuar në 48 numrin total të viktimave.
Iconstyle.al ka siguruar një foto të një autoambulance para spitalit Infektiv.
Kjo është viktima e dytë e shënuar gjatë 24 orëve të fundit, pasi më herët u raportua se ka ndërruar jetë një 34-vjeçare e infektuar me Covid-19 tek Infektivi, e cila sipas Ministrisë së Shëndetësisë kishte dhe sëmundje bashkëshoqëruese.
Ditën e sotme u raportuan 67 raste të reja, duke e çuar numrin në total në 1217.
Në mesin e tyre ishin edhe 7 mjekë edhe infermierë.
Aktualisht në Shqipëri janë 850 persona aktivë, kryesisht në Tiranë, Shkodër, Durrës, teksa në spitalin infektiv po trajtohen 82 pacientë, ku 14 prej tyre janë në terapi intensive.
“Një pacient 90 vjeçar nga Tirana ka ndërruar jetë në spitalin infektiv në QSUT, i prekur nga COVID19, me disa sëmundje bashkëshoqëruese silikoza, hipertension. Ministria e Shëndetësisë i shpreh ngushëllime familjes së të ndjerit dhe i rikujton qytetarëve rëndësinë që ka respektimi i masave mbrojtëse për të kufizuar përhapjen e COVID-19”, thuhet në njoftimin e MSH.
