SHBA po përgatit një paketë tjetër të mbështetjes ushtarake me vlerë 750 milionë dollarë që do të shpallet në ditët në vijim, tha një zyrtar i lartë i mbrojtjes amerikane.
Dorëzimi do të përfundojë këtë javë me 800 milionë dollarë ndihmë ushtarake të miratuar nga Presidenti Joe Biden një muaj më parë.
Presidenti ukrainas Volodymyr Zelenskyy i ka bërë një ofertë Rusisë në një fjalim herët këtë mëngjes.
Ai propozoi shkëmbimin e politikanit të lartë pro-rus Viktor Medvedchuk me të burgosurit e luftës që mbahen nga forcat e Moskës.
Zelenskyy tha se ishte “e rëndësishme që forcat e sigurisë dhe ato ushtarake të shqyrtonin një mundësi të tillë”.
Shërbimet sekrete të Ukrainës thanë më herët se kishin arrestuar z. Medvedchuk, i cili është aleati më i afërt dhe më me ndikim i Vladimir Putin në Ukrainë.
Politikani ukrainas pro-rus u fotografua me pranga në një postim të ndarë nga vetë Zelenskyy.
Ndërkohë, sulmet ruse në qytetin e Mariupolit vijojnë intensivisht prej gjashtë javësh, duke shkaktuar dëme të pallogaritshme.
Ushtria ukrainase thotë se ata po bëjnë të pamundurën për mbrojtjen e vendit të tyre dhe pranojnë se forcat ruse kanë për qëllim kryesorë të marrin nën kontroll të plotë qytetin.
Sipas BBC besohet se forcat ukrainase janë detyruar të kthehen në zonën e portit të qytetit jugor në fabrikën e çelikut dhe hekurit Azovstal, nga ku kishin nisur kundërsulmet për javë të tëra.
Rrethimi i qytetit ka vështirësuar furnizimin e forcave ukrainase me ushqim, ujë dhe municione, njëkohësisht ka penguar edhe evakuimin e të plagosurve.
Forcat ruse filluan rrethimin e Mariupolit në fillim të marsit duke vrarë mijëra civilë, ndërsa shumë banorë kanë mbetur të bllokuar.
Nëse Mariupol bie në duart e Rusisë, ai do të sigurojë kontrollin e një zonë strategjike që lidh dy frontet e Moskës në jug dhe në lindje.
Mariupol është shtëpia e më shumë se 400,000 njerëzve para luftës, ndërsa një pjesë e tyre janë larguar për t’i shpëtuar luftës.
